Ապրիլի 18-ին՝ ժամը 17:00-ին, Թեքեյան կենտրոնում (հասցե՝ Երեւան, Խանջյան 50) կկայանա «Հայաստանի պատմական քարտեզագրության ատլաս» վերահրատարակված աշխատության շնորհանդեսը:
Ատլասը հրատարակվել է Հայասատանի Թեքեյան Մշակութային Միության նախաձեռնությամբ եւ անվանի բարերար, գործարար Ռուբեն Գրիգորյանի մեկենասությամբ: Քարտեզագետ՝ աշխարհագրական գիտությունների դոկտոր Վարդան Մխիթարյան: Մեծածավալ ատլասը լույս է տեսել երեք լեզուներվ՝ ռուսերեն, անգլերեն, ֆրանսերեն: Դրանք կնվիրաբերվեն Հայաստանի եւ արտերկրի հայագիտական կենտրոններին, գրադարաններին, դեսպանատներին, գիտակրթական հաստատություններին:
Այն իր ձեւով եւ բովանդակային լուծումներով բացառիկ ուսումնասիրություն է: Ատլասը հայ իրականության մեջ առաջին անգամ հրատարակված պատմական քարտեզների մեծածավալ հավաքածուն է, որը նպատակ էր հետապնդում քարտեզների միջոցով ներկայացնել պատմական ժամանակաշրջանների հերթափոխը, անցյալի իրադարձությունների արդյունքում ձեւավորված տարածական փոփոխությունները եւ լուսաբանել հայերի եւ Հայաստանի բազմադարյան պատմությունը: Ներկայացված հանրածանոթ հին քարտեզները եւ դրանցում Հայաստան անվան առկայությունը փաստում է համաշխարհային պատմության կերտման մեջ Հայաստան երկրի ունեցած դերն ու կարեւորությունը:
Հավելենք, որ մինչեւ XX դարի 60-ականները հրատարակված եւ մեծ հետաքրքրություն ներկայացնող աշխատությունների մի զգալի մասը, տարբեր պատճառներով, անհասանելի է ուսումնասիրողներին: Նման աշխատանքների թվին է դասվում նաեւ ֆրանսահայ նշանավոր քարտեզագետ Զատիկ Խանզադյանի «Հայաստանի պատմական քարտեզագրության ատլաս»-ը: Այս «Ատլաս»-ի վերատպումը հսկայական նշանակություն ունի անցյալի մասին գիտելիքները պահպանելու գործում՝ իրական հնարավորություն ստեղծելով հանրության ավելի ընդգրկուն շրջանակների համար՝ օգտվելու այս հազվագյուտ ստեղծագործությունից: «Ատլաս»-ի վերատպումը տեղեկատվությունը կդարձնի ավելի մատչելի եւ հասանելի Հայաստանի մասին պատմական քարտեզներն ուսումնասիրողների՝ պատմաբանների, աշխարհագետների, քարտեզագիրների, ուսուցիչների եւ անցյալով հետաքրքրվող յուրաքանչյուրի համար:
Սիրով հրավիրում ենք լուսաբանելու:
Հարգանքներով՝
Հայաստանի Թեքեյան Մշակութային Միության լրատվական կենտրոն
հեռ.՝ 010 55 26 32, 010 57 02 83:
