Հուլիսի 1-ից սկսած բնակչությունը կարող է բարձի տակ կամ դրամապանակում պահվող գումարը պակասեցնել:
2022-ի հունվարի 18-ին «Անկանխիկ գործառույթների մասին» օրենք ընդունվեց, որն ուժի մեջ մտավ հուլիսի 1-ից. «Օրենքի ուժի մեջ մտնելուց հետո անհատ ձեռնարկատերերի, նոտարների, փաստաբանների եւ կազմակերպությունների կողմից կնքվող այն գործարքների համար, որոնց մի կողմը ֆիզիկական անձ է, եւ այն գործարքների դիմաց, որոնք կնքվում են ֆիզիկական անձանց միջեւ եւ գերազանցում են 300 հազար դրամի շեմը, վճարումն իրականացվում է անկանխիկ ձեւով»,- ասվում է հիմնավորման մեջ:
ՀՀ Կենտրոնական բանկի մեկնաբանմամբ, Օրենքի առաջին եւ կարեւոր նպատակը ՀՀ քաղաքացիների՝ անկանխիկ վճարումներ կատարելու իրավունքի իրացումն է, ինչպես նաեւ քաղաքացուն հնարավորություն տալը՝ անկանխիկ կենսակերպ վարելուն զուգահեռ ստանալու ֆինանսական ավելի լայն ծառայություններ:
«Օրենքը նպաստելու է մեր երկրում թվայնացման գործընթացին, ստվերի կրճատմանը, որը նշանակում է՝ ավելի շատ հարկերի հավաքագրում, կրթության, գիտության, առողջապահության ֆինանսների ծավալի մեծացում»,- մանրամասնում են Կենտրոնական դրամատնից:
Հուլիսի 1-ից Երեւանում ամբողջությամբ անկանխիկ վճարային համակարգի են անցել նաեւ բժշկական կենտրոնները:
Օրենքի արդյունավետ լինելու Կառավարության կոչերին հավասար՝ քիչ չեն նաեւ քաղաքացիների դժգոհությունները, որոնք արտահայտվում են հատկապես մեծահասակների մոտ:
«Ունեմ թոշակային քարտ, որից անձամբ չեմ օգտվում, տալիս եմ թոռնիկիս, որ գնում, գումարը ստանում, բերում է: Դա էլ անցած տարի եմ ստիպված վերցրել, քանի որ օրենքի համաձայն՝ մինչեւ 75 տարեկան թոշակառուները իրենց թոշակը պետք է ստանան անկանխիկ եղանակով»,- մեզ հետ զրույցում ասում է 61-ամյա Մարիաննան:
Քաղաքացիների մի մասն էլ կողմ է օրենքի ընդունմանը, սակայն վերպահումներով: 54-ամյա Գոհարը ասում է, որ օրենքի օգտակարությունը հարկերի ստվերից հանվելն է, սակայն դեմ է, քանի որ ոչ բոլորն են կարողանում օգտվել անկանխիկ վճարման համակարգից եւ սահմանափակումը պետք է կապված լիներ ոչ թե գումարի չափին, այլ հասարակության տարիքային շերտի հետ:
Հունիսի 2-ի նիստին վարչապետ Նիկոլ Փաշինյանը հայտարարել է, որ. «Դրույթ է լինելու, որ եթե հանկարծ որեւէ պարագայում կանխիկ վճարումներով տեղի կունենա գործարք, եւ չի արձանագրվի անկանխիկ փոխանցումը, դա կարող է այդ գործարքը հետագայում առոչինչ ճանաչելու հիմք դառնալ: Որեւէ մեկը չմտածի, թե մենք ուզում ենք մարդկանց կյանքը բարդացնել, հակառակը՝ մենք ուզում ենք մարդկանց կյանքը պարզեցնել: Այստեղ կան նաեւ հարկաբյուջետային եւ հակակոռուպցիոն էֆեկտներ»:
Այսպիսով՝ քեշի շրջանառությունը կկրճատի ստվերն ու կոռուպցիան, սակայն հասարակության սթրեսակայունությունը կհասցնի նվազագույնի:
ՀԱՍՄԻԿ ՄԽԻԹԱՐՅԱՆ
