Հայ միջնադարյան խոշոր բանաստեղծ, կաթողիկոս Ներսես Շնորհալիի մահվան 850-ամյակին նվիրված նախաձեռնությունների շրջանակում իտալական «Ստուդիո դոմենիկո» հրատարակչության «Տաղանդներ» մատենաշարով լույս է տեսել «Էկումենիկ նամակներ Մանուիլ Կոմնենոս կայսերը» հատորը (ներածությունը, գրաբարից իտալերեն թարգմանությունը եւ ծանոթագրությունները՝ Ռիկարդո Պանեի, քննադատական տեքստը՝ Ազատ Բոզոյանի):
Ըստ գրքի ծանուցման՝ չորս դոգմատիկ նամակները, որոնք Ներսես Շնորհալին ուղարկել է Բյուզանդիայի կայսր Մանուիլ Ա Կոմնենոսին (1118-1180), հայ քրիստոսաբանության լավագույն էջերից են: Դրանք նաեւ ի հայտ են գալիս որպես քրիստոնեական միասնության էկումենիկ ծրագիր. դրանք ակնարկում են դարերի ընթացքում էկումենիկ շարժման ձեռքբերումները եւ քրիստոնեական միասնության վերաբերյալ Վատիկանի Երկրորդ ժողովի հեռանկարները: Որոշ առումներով հայոց կաթողիկոս Ներսեսի ներըմբռնումները մնում են որպես մարգարեություն, որոնք դեռ իրենց իրագործմանն են սպասում: Հատորն առաջին անգամ ներկայացնում է Շնորհալու նամակներն իտալերեն թարգմանությամբ՝ ծանոթագրություններով հանդերձ, որոնք ընթերցողին օգնում են կողմնորոշվել հայ քրիստոսաբանության բարդ հարցերի եւ քաղկեդոնականների ու ոչ քաղկեդոնականների աստվածաբանական բանավեճի մեջ:
Ա. Բ.
