Մարտի 15-ին լրագրողների հետ զրույցի ժամանակ Հայաստանի Կենտրոնական բանկի նախագահ Մարտին Գալստյանը հայտարարել է, որ մարտի 2-ից հետո Հայաստանի Հանրապետության տարբեր բանկերում գրանցվել է շուրջ 6500 մարդ: Նա նշեց նաեւ, որ բանկերը ՌԴ քաղաքացիներին խիստ ընթացակարգերով են գրանցում.
«Բանկերը պատշաճ ուսումնասիրում են իրենց նոր հաճախորդներին, որպես կանոն փորձում են հասկանալ, թե հաճախորդները «տրանզիտ» հաճախորդնե՞ր են, թե՞ նրանց տնտեսական շահի կենտրոնն այս պահին հանդիսանում է ՀՀ-ն։ Եթե երկրորդ տարբերակն է, այսինքն` հաճախորդները ներգրավվում են ՀՀ բանկային համակարգ, որովհետեւ իրենց տնտեսական շահի կենտրոնի փոփոխություն է տեղի ունեցել, ապա որեւէ խնդիր չի առաջանում»,– ասաց Գալստյանը»:
ԿԲ նախագահը չի բացառում, որ բանկը կարող է նաեւ մերժել այն հաճախորդներին, որոնք ուղղակի ցանկանում են իրենց գումարները Հայաստանի բանկային համակարգի միջոցով արտերկիր փոխանցել:
ՀՀ ոստիկանության Անձնագրային եւ վիզաների վարչության պետ Արա Մկրտչյանը մարտի 14-ին «Sputnik Արմենիայի» հետ զրույցում հայտնել էր, որ փետրվարի 24-ի «հատուկ ռազմական գործողության» մեկնարկից ի վեր ՀՀ իշխանությունները Ռուսաստանի եւ Ուկրաինայի քաղաքացիներից ընդհանուր առմամբ 355 դիմում են ստացել Հայաստանի քաղաքացիություն ստանալու հարցով։
Դիմածներից 349–ը ՌԴ քաղաքացիներ են, 6–ը` Ուկրաինայի։
Գ.Գ.
