Ձեզ միայն մանդա՞տն էր պետք, տղե՛րք

«Մենք ունենք ժողովրդի մանդատը»,- ամեն Աստծո օր կրկնում են ՀՀ իշխանություններն ու անարգել անում ինչ ուզում են, ո՛չ ձեռքները բռնող կա, որ առաջները կտրող:

2 տարվա մեջ ընդդիմությունը ոչ մի անգամ չասաց՝ մենք էլ ունենք  ժողովրդի մանդատը, 300 հազար մարդ մեզ քվե է տվել, որպեսզի երբ Փաշինյանը գա խորհրդարան, ոչ թե բոյկոտենք, արհամարհենք նրա ներկայությունը, այլ մնանք դահլիճում ու թույլ չտանք, որ ինքն ու իր թիմն ուղիղ եթերում բոլոր թեմաներն ինչպես ուզեն, այնպես էլ ներկայացնեն, հանրությանը կեռ տան, մանիպուլացնեն, աչքներին թոզ փչեն, խաբեն ու մեր բացակայությամբ սեփական քարոզն անարգել իրականացնեն, ջրից նորից չոր դուրս գան:

Էկրանից այս կողմ հազարավոր մարդիկ լսում եւ տեսնում են Փաշինյանի ու նրա թիմի ձեռնածությունները, թե ինչպես են նախորդ տասնամյակների դիվանագիտական աշխատանքը ջուրը  գցում, պայմանագրեր  աղավաղում, Արցախը հայտարարում  Ադրբեջանի մաս, Հայաստանից էլ՝ ի՞նչ մնաց, մնաց, ընդդիմությունը բոյկոտել է, դահլիճից հեռացել:
Մի քիչ հետո սոցցանցերը ճաք են տալիս գրառումներից ու վերլուծություններից, Փաշինյանին ցեխը մտցնել-հանելուց, վրդովված բողոքներից ու սարկազմից:

Մի հարցնող լինի՝ պարոնայք ընդդիմադիրներ, ձեր տներից էլ կարող էիք լսել Փաշինյանի ելույթները, բայց ոչ արդեն որպես ընդդիմադիր պատգամավորներ, ու էլի ֆեյսբուքյան ստատուսներ, տելեգրամյան վերլուծություններ կանեիք: Ձեզ պատգամավորի մանդա՞տն էր միայն պետք:

Սոցցանցերի գրառումները, պանելային քննարկումների ժամանակ ձեր ելույթները, հեռուստաընկերություններին հյուր լինելը խաղաղ ու անվրդով ժամանակների պատգամավորի գործելաոճ կարող է լինել, բայց ոչ կործանվող երկրի, իսկ կործանողի գոնե բերանը փակող չկա: Այդ բերանը «փակում-ծեփում-շշպռում» են միայն սոցցանցերում:

Թող Փաշինյանը կաթվածի հասցնող հերթական սենսացիոն, կործանարար հայտարարությունն անի, որ դուք էլ գործ ունենաք, հո պարապ չե՞ք նստելու: Գրեք-ջնջեք, հետո  ավելի սուր գրեք, մի-երկու «կծող» արտահայտություն, «պորտը տեղը դնող» փաստեր, աղաղակող ապացույցներ,  համեմատեք նրա երեկվա ու այսօրվա խոսքերը, գտեք հակասությունները, հետո լսեք Ալիեւին ու համեմատություններ անց կացրեք Փաշինյանի ու նրա ասածի միջեւ… վերջ. էս ի՜նչ լուրջ գործի եք, տղերք:

Առանց այդ էլ խորհրդարանական ընդդիմությունը  մեկ տարի առաջ մեծ թափ հավաքող բողոքի ցույցերը, սրտացավ, հայրենապաշտպան զանգվածի ազնիվ մղումներն աստիճանաբար վիժեցրեց: Ոչ ոք քայլելով Նիկոլ չի դառնա՝ առանց ծրագրի ու խելացիորեն մշակված քաղտեխնոլոգիաների:

Բայց մենք ճանաչեցինք նաեւ մեր ընդդիմությանը, ճանաչեցինք, որ այլեւս որեւէ սպասում չունենանք նրանից՝ ֆեյսբուքյան ու տելեգրամյան ստատուսներից բացի:
Ձեզ միայն մանդատն էր պետք, տղերք:

ՆԱԻՐ ՅԱՆ