Հարգելի Երզնկացյան եւ Ուզունյան ընտանիքների անդամներ,
Խոր վշտով տեղեկացանք անվանի վիրաբույժ, պրոֆեսոր Գրիգոր Երզնկացյանի մահվան լուրը:
Ընդունեք Հայաստանի Թեքեյան մշակութային միության անդամների խորին ցավակցությունները՝ անժամանակ եւ ծանր կորստի համար:
Գրիգոր Երզնկացյանն իր կյանքը նվիրել է Արեւելյան, Կենտրոնական եւ Հարավային Աֆրիկայում բժշկության ոլորտի զարգացմանը, վիրաբույժների ուսուցմանը, որակյալ մասնագետների պատրաստմանն ու իր մասնագիտական փորձը նրանց փոխանցելուն:
Վիրաբուժության ոլորտում միջազգային ճանաչում ունեցող պրոֆեսոր Երզնկացյանը պարբերաբար այցելում էր Հայաստան, ծավալում վիրաբուժական եւ բարեգործական գործունեություն՝ ի սպաս իր ժողովրդին ու հայրենիքին:
Գրիգոր Երզնկացյանի բացակայությունը մեծ կորուստ է ինչպես բժշկության ոլորտի, այնպես էլ հայ ժողովրդի համար:
Նրա կյանքը համակ նվիրում էր բժշկությանը, բժշկի եւ բարերարի բացառիկ օրինակ, ինչի շնորհիվ հազարավոր կյանքեր էին փրկվում:
Սփոփանքի եւ վշտակցության խոսքեր ենք ուղղում նրա ընտանիքին, հարազատներին, բարեկամներին եւ գործընկերներին:
Գրիգոր Երզնկացյան մարդու եւ վաստակաշատ բժշկի փայլուն կերպարը մշտապես վառ կմնա նրան ճանաչողների սրտերում:
Ի ԴԻՄԱՑ ՀԹՄՄ ԿԵՆՏՐՈՆԱԿԱՆ ՎԱՐՉՈՒԹՅՈՒՆ
ՌՈՒԲԵՆ ՄԻՐԶԱԽԱՆՅԱՆ
«Ազգ»ը միանում է ցավակցություններին:
