Հոկտեմբերի 15-ին Բուխարեստի կենտրոնական Աթենեում համերգասրահում կայացավ դաշնակահարուհի Իլինկա Դումիտրեսկու մենահամերգը: Երկացանկը կազմված էր բացառապես հայ երգահանների դաշնամուրային ստեղծագործություններից: Համերգի ընթացքում հնչեցին Կոմիտաս-Սարաջյանի, Արամ Խաչատրյանի, Առնո Բաբաջանյանի, Գայանե Չեբոտարյանի, Արամ Սաթյանի եւ Կարեն Անանյանի ստեղծագործություններից:
Արվեստի եւ գրականության շքանշանի դափնեկիր Իլինկա Դումիտրեսկուն (ծնված 1952-ին, կոմպոզիտոր Իոն Դումիտրեսկուի ընտանիքում) Ռումինիայի կատարողական արվեստի հեղինակավոր անուններից է, միջազգային ճանաչում ունեցող դաշնակահարուհի, որը ելույթ է ունեցել հինգ մայրցամաքների 46 երկրներում եւ աշխարհի 39 մայրաքաղաքների կարեւորագույն համերգասրահներում: Նրա լայնածավալ երկացանկը ներառում է համերգներ նվագախմբի հետ եւ մենահամերգային ստեղծագործություններ ինչպես դասական (Բախ, Սկառլատտի, Հայդն, Մոցարտ, Բեթհովեն, Շուման, Շոպեն, Շուբերտ, Ալբենիզ, Սիբելիուս, Մեսիայեն, Էնեսկու, Ժորա), այնպես էլ ժամանակակից կոմպոզիտորներից:
Ավելացնենք, որ համերգը կազմակերպվել էր ռումինահայ մշակութային գործիչ, թարգմանչուհի Մադլեն Գարագաշյանի ջանքերով:
Ա. Բ.
