Անցած կիրակի, դեկտեմբերի 3-ը, շատերիս համար նշանակալից էր. այդ օրը, Բելգրադի «Հայաթ» հյուրանոցի սրահներն ընդգրկուն էին գույների, համուհոտերի, ազգերի, լեզուների եւ մշակույթների համադրությամբ: Աշխարհի 29 երկրների դեսպանատներ իրենց դրոշներով եւ ցուցասեղաններով ներկայացրեցին ազգային մշակույթի որոշ նմուշներ, ազգային քաղցրավենիք եւ ուտեստ: Հայաստանը հավուր պատշաճի ներկայացնելու գործում մեծ ավանդ ներդրեց մեր հայրենակցուհի Լիանա Ջավալյանը, որը Բելգրադում գործող Կանանց միջազգային ակումբի (IWC) անդամ է, եւ այս միջոցառումն ամեն տարի անցկացնում են հենց այդ ակումբի տարբեր ազգերի ներկայացուցիչ կանայք:
Ցուցահանդես-վաճառքից գոյացած գումարը տրամադրվում է բարեգործական նպատակների: Այս անգամ էլ այն տարբեր հասարակական կազմակերպությունների միջոցով կուղղորդվի կարիքավոր կանանց:
Հայկական ցուցասեղանը լի էր ավանդական քաղցրավենիքով. գաթա, ընկույզի, հոնի, թթի անուշներ, ընկույզով շարաններ, հուշանվերներ, զարդեր, գրքեր եւ իհարկե՝ կոնյակ: Մարդկանց հետաքրքրությունը մեծ էր, իսկ որոշ ապրանքատեսակների քանակը՝ սահմանափակ: Հայուհիները՝ Գայանեն, Իրինան, Բերտան, Աստղիկը, Նոնան եւ Լիանան, որոնք զբաղված էին ցուցադրված նմուշներն առաջարկելով, ներկայացնելով եւ վաճառելով, հանդերձվել էին վառ գույնի տարազներով եւ անչափ հմայք էին պարգեւել իրադարձությանը: Պետք է նշել, որ այդ տարազները պատրաստվել էին շնորհաշատ Լիանայի ձեռքերով: Փոքրիկները՝ Միքայելը, Լենան եւ Նոննան, նույնպես զուգվել էին Լիանայի կարած տարազներով:
Բացի այս ցուցասեղանի ցուցահանդես վաճառքից, Հայաստանի մասնակցությունը նշանակալից էր նաեւ հայ երաժշտության ներկայացմամբ. «Կուժն առա», «Նուբար» եւ «Կաքավիկ» երգերը կատարեցին Անուշ Հովհաննիսյանը եւ Անուշ Բալայանը, իսկ նրանց նվագակցում եւ ձայնակցում էին սերբ երաժիշտներ Լուկա Յոկսիմովիչ Բարբաթն ու Ուրոշ Մարտինովիչը:
Ուրախ ենք, որ մեր մտքի եւ ձեռքի աշխատանքից գոյացած գումարը կուղղվի բարեգործության:
Խաղաղություն ամենքիս, խաղաղություն Երկիր մոլորակին, մեր մայր հայրենիքին:
ԱՆՈՒՇ ԲԱԼԱՅԱՆ
Բելգրադ
