Ինչպես ամեն տարի ապրիլին, 2025-ին էլ Հայոց ցեղասպանության զոհերին հիշատակելու, ոգեկոչման արարողություններ տեղի կունենան Գերմանիայի տարբեր քաղաքների եկեղեցիներում եւ բացօթյա՝ հայկական խաչքարերի շուրջ: Լայպցիգի սուրբ Նիկողայոս եկեղեցում ապրիլի 14-ին անցկացված հուշահանդեսը, մեր իրազեկմամբ, առաջինն է: Երկրորդը՝ ապրիլի 19-ին է, Բրաունշվայգում: Ապրիլի 24-ին տարբեր միջոցառումներ են նախատեսված Բեռլինում, Քյոլնում, Բրեմենում, Մյունխենում, Շտուտգարդում, Հալլեում: Ապրիլի 25-ին՝ Նոյվիդում, 26-ին՝ Մայնի Ֆրանկֆուրտում, Նյուրնբերգում, Այշի Հյոխշտատում, Մյուլհայմում, ապրիլի 27-ին՝ Բեռլինում եւ Քեհլում եւ այլն:
Տարիների ավանդույթը չի խախտվում այս տարի էլ, եւ Գերմանահայոց առաջնորդարանի եւ Գերմանահայոց կենտրոնական խորհրդի միացյալ ջանքերով կազմակերպվող երկու կենտրոնական հուշահանդեսները անցկացվելու են ապրիլի 24-ին Բեռլինի պատգամավորների պալատում, իսկ ապրիլի 26-ին՝ Մայնի Ֆրանկֆուրտի սուրբ Պողոսի տաճարում: Հիշյալ երկու արարողությունների հրավիրատոմսի վրա այս տարի բացակայում է երրորդ համակազմակերպչի՝ Բեռլինում ՀՀ դեսպանության հիշատակումը, եւ անորոշ է մնում՝ Հայոց ցեղասպանության 110-ամյակին նվիրված ոգեկոչման հանդիսություններին ներկաներն ունկնդրելո՞ւ են ՀՀ դեսպանի ելույթը, ինչպես եղել է 2025-ից առաջ:
2025 -ի ապրիլի 24-ից մինչեւ մայիսի 31-ը Բեռլինի Մաքսիմ Գորկի թատրոնում տեղի կունենա մշակութային միջազգային փառատոն՝ «100 + 10 Հայկական Այլաբանություններ» (100 + 10 Armenian Allegories) խորագրով: Փառատոնի ծրագիրը ծանուցում է, որ ավելի քան մեկ ամիս ԳԴՀ մայրաքաղաքում կներկայացվեն Հայաստանի, Արցախի եւ Սփյուռքի հայ եւ օտարազգի արվեստագետների գործեր, որ պատմում են Հայոց ցեղասպանության, Արցախյան պատերազմների, ինչպես նաեւ հայաստանյան արդի իրականության մասին: Փառատոնի ծրագիրը ներառում է թատերական ներկայացումներ, լուսանկարչական ցուցահանդեսներ, ժամանակակից գրականություն, ֆիլմերի ցուցադրություն, համերգներ, զրույց-քննարկումներ՝ հայ եւ գերմանախոս արվեստագետների միջեւ: Փառատոնը գլխավորում է Մաքսիմ Գորկի թատրոնի ղեկավար Շերմին Լանգհոֆֆը, որ հայերիս բարեկամն է, եւ մեկ անգամ չէ, որ իր ղեկավարած բեմական հարթակը ծառայեցնում է հայկական թեման լուսաբանելուն: Փառատոնի գլխավոր համադրողն է Վիգեն Գալստյանը (Երեւան):
Հիշյալ նախագծում ընդգրկված են ավելի քան 150 արվեստագետներ: Նրանց թվում են Տիգրան Համասյանը, Ատոմ Էգոյանը, Արսինե Խանջյանը, Շողակաթ Վարդանյանը, Սամվել Թադեւոսյանը, Նազիկ Արմենակյանը, Ջիվան Ավետիսյանը եւ ուրիշներ՝ Հայաստանից, Նիդեռլանդներից, Կանադայից, Ֆրանսիայից, Գերմանիայից, Թուրքիայից եւ աշխարհի այլ ծայրերից:
ԱՆԱՀԻՏ ՀՈՎՍԵՓՅԱՆ
Գերմանիա
Նկարում՝ Հայոց ցեղասպանպության 110 ամյակի միջոցառումները Գերմանիայում» հոդվածին կից լուսանկարն է: Գորկի թատրոնի փառատոնում ներկայացվում է Փիրուզա Խալափյանի «Դժոխքի դուռը» ստեղծագործությունը՝ Արցախի Շահումյանի շրջան, Նոր Գետաշեն, 2020 թվական:
Ծրագրի մանրամասններին (գերմաներեն եւ անգլերեն) կարելի է ծանոթանալ այստեղ:
https://www.gorki.de/sites/default/files/2025-03/Gorki–SZH%2331–RZ–Inlay–neu.pdf
