Հոկտեմբերի 19-ին ժամը 10. 30-ին Վատիկանի սուրբ Պետրոսի հրապարակում տեղի կունենա երանելի Իգնատիոս արք. Մալոյանի եւ 6 այլ երանելիների սրբադասման հանդիսավոր արարողությունը, որ գլխավորելու է Նորին սրբություն Լեւոն ԺԴ պապը: «Վատիկաննյուզի» սույն ծանուցմանը հավելենք Լիբանանի Հ. Կ. Պատրիարքական թեմի հաղորդագրությունը, որ իրազեկում է, թե հոկտեմբերի 20-ին ժամը 11-ին հանդիպելու են Հռոմի քահանայապետ Լեւոն ԺԴ պապին, իսկ նույն երեկոյան՝ ժամը 18-ին սուրբ Պետրոսի տաճարում գոհաբանական պատարագ է կատարվելու Տանն Կիլիկիո Կաթողիկե Հայոց Ն.Ա.Գ.Տ.Տ. Ռափայէլ-Պետրոս ԻԱ. Մինասեան պատրիարքի հանդիսապետությամբ:
Արարողությանը հայերեն մեկնաբանությամբ կարելի է հետեւել ուղիղ եթերով` Youtube-ի հետեւեալ հասցեով https://www.youtube.com/live/zD–BBY7SR8Q ու նաեւ https://www.vaticannews.va/hy.html կայքէջի միջոցով:
Սուրբ Իգնատիոս Մալոյանը ծնվել է 1869 -ի ապրիլի 15-ին, Մարդինում: 14 տարեկանում կրթություն է ստացել Զըմմառի (Լիբանան) դպրեվանքում: Սովորել է աստվածաբանություն, փիլիսոփայություն, լեզուներ: 1915-ի ապրիլի 30-ին օսմանյան կառավարական մարմինները ներխուժել են Մարդինի հայ կաթողիկե եկեղեցի, առգրավել գույքը, նամակներն ու արխիվը:
Մայիսի 1-ին արքեպիսկոպոս Մալոյանը հավաքում է հոգեւորականներին, տալիս վերջին վկայությունը՝ պատգամելով քաջություն, հավատք եւ ուխտապահություն: Հունիսի 3-ին Մալոյանը համայնքային առաջնորդների հետ ձերբակալվում է, հարցաքննվում, բազմիցս առաջարկում են իսլամություն ընդունել: Վճռական մերժում է: Հունիսի 11-ին շուրջ 400 հավատացյալների հետ շղթայված աքսորվում է Մարդինից: «Մալոյանի քարավան» անվամբ է կնքվում տառապալից այն ճանապարհը, որ անցել է: Օսմանյան կառավարության ներկայացուցիչը Մալոյանին բաժանում է քարավանից, վերջին անգամ ներկայացնում հավատափոխ լինելու առաջարկը, որ մահից փրկվելու միակ ուղին էր: «Ես երբեք չեմ ուրանար իմ Տէրն ու Փրկիչը՝ Յիսուս Քրիստոսը… Ես զիս կը համարեմ բախտաւորներէն մէկը, որ պիտի հանդիպիմ Աստուծոյ՝ երկինքի բարձրութեանց մէջ», եղել է Մալոյանի պատասխանը:
Իգնատիոս Մալոյանը նահատակվել է 1915 -ի հունիս 11-ին: Նրա քույրերն ու եղբայրներն էլ զոհ են գնացել, անհետացել են Հայոց ցեղասպանության ընթացքին: «Իր մահն իր հաւատքին անձնական վկայութիւնն էր, բայց նաեւ խորհրդանիշը անթիւ հայերու, որոնք Մեծ Եղեռնի ընթացքին մերժեցին հրաժարիլ իրենց քրիստոնէական ինքնութենէն», Մալոյանի կենսագրականն ամփոփում է Վարդան Թաշճյանը:
ԱՆԱՀԻՏ ՀՈՎՍԵՓՅԱՆ
