Անցյալ տարի լույս է տեսել ֆինն հետազոտող, գրականության, կինոյի եւ անիմացիայի մասին գրքերի հեղինակ Յուրի Նումմելինի «Մրջյունից մինչև Չեբուրաշկա. Ռուսական և խորհրդային անիմացիոն ֆիլմերի պատմություն» աշխատությունը (ֆիններեն)։ Այնտեղ անդրադարձ կա նաեւ հայ մուլտիպլիկացիայի հիմնաիդր Լեւ Ատամանովին (Լեւոն Ատամանյան)։ Հեղինակը հատուկ անդրադարձ է կատարել նրա կինոնկարներին, սակայն մինչ այդ, խոսելով 1930-ական թվականների մասին, գրել է. «1930-ականներին ի հայտ եկած մուլտիպլիկատորներից հայ Լեւ Ատամանովը (1905–1981) դիպուկ եւ ինտրիգային արվեստագետ էր, որի կարիերան սկսվեց 1930-ական թվականներին մի գնչու արկածախնդրի մասին ֆիլմերի շարքով: 1938 թվականին Երեւանում նա հիմնել է անիմացիոն ստուդիա, որտեղ նկարահանել է «Շունն ու կատուն» (1938) եւ «Տերտերն ու այծը» (1941) ֆիլմերը։ Ինչպես Էյնսն է նկատել, նրա ֆիլմերում եւս Դիսնեյի ազդեցությունները միավորված են ժողովրդական հեքիաթի հետ։ Ատամանովի կարիերան շարունակվեց մինչև 1960-ական թվականները, եւ նա իր հին ֆիլմերից մի քանիսը նորից նկարահանեց օրիգինալ տեսքով» (էջ 30)։ Նկատենք, որ վերոնշյալ մուլտֆիլմերի վերնագրերը հեղինակը տվել է հայերեն բնագրով՝ փակագծում տալով ֆիններեն թարգմանությունը։
Ա. Բ.
