Վերջերս ավարտվեց հոբելյանական 5-րդ Հայկական համադպրոցական գիտության փառատոնը:Այն կայացավ ՀՀ գիտությունների ազգային ակադեմիայում:
Եզրափակիչ փուլում իրենց հետազոտության արդյունքները ներկայացրեցին 250 սովորողներ Երեւանից եւ ՀՀ մարզերից: Ներկայացված 94 նախագծերը վերաբերում էին հինգ հիմնական անվանակարգերին՝ մաթեմատիկա-ծրագրավորում, ֆիզիկա-աստղագիտություն, քիմիա, կենսաբանություն, սոցիալական գիտություններ:
Ուսումնասիրության թեմաների շրջանակը լայն էր եւ բազմազան: Այս տարի աշակերտները մեծ ուշադրություն են դարձրել շրջակա միջավայրի խնդիրներին՝ Սեւանա լճի ձկնատեսակներին, Գետառի ջրի որակին, հանքավայրերի պոչամբարների ազդեցությանը, ջրում ծանր մետաղների առկայության բացահայտմանը, ռադիացիայի չափմանը, այլընտրանքային էներգիային, ինչպես նաեւ Երեւանում եւ Գյումրիում օդի աղտոտվածության մակարդակներին ու մեղմման եղանակներին: Ավանդական դարձած թեմաների հետ մեկտեղ, աշակերտներին հետաքրքրել են նաեւ համաշխարհային օվկիանոսը նավթից մաքրելու հիմնախնդիրը եւ բիոնիկայի կիրառմամբ սարդ-ռոբոտի նախագծման աշխատանքները:
Հետաքրքրական էին նաեւ կիրառական նախագծերը, որոնց շրջանակներում աշակերտները գիտափորձերի արդյունքում ստացել էին էկոլոգիապես մաքուր օճառ, օծանելիք, հայտնի կտավների մոմե կրկնօրինակներ, զարդեր, դեղաբույսերից բուժիչ պատրաստուկներ, ինչպես նաեւ վառելանյութ եւ պարարտանյութ: Աշակերտների հետաքրքրության շրջանակում շարունակում են մնալ նաեւ հայագիտական եւ հումանիտար նախագծերը՝ հայ պատմամշակութային ժառանգության պահպանմանն ուղղված հարցերը:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
