ԻՄԱՍՏԱԲԱՆԱԿԱՆ ԲԱՌԱՐԱՆ

Կուսակրոն

Կույսը (լատին.՝ Virgo) կենդանակերպի վեցերորդ նշանն է, որի ղեկավարող մոլորակը Մերկուրին է:

Արեւմտյան աստղագիտության համաձայն, օգոստոսի 22-ից մինչեւ սեպտեմբերի 23-ը Արեւը հայտնվում  է  Կույսի տակ:

Այսքանը՝ աստղագիտությունից: Իսկ ի՞նչ է ասում լեզվաբանությունը ԿՈՒՅՍԻ մասին:

Լեզվաբանությունը չամուսնացած ու անձեռնամուխ աղջիկ իմաստով ԿՈՒՅՍ բառի  ծագումնաբանության մասին, մի քանի կասկածելի եւ չհիմնավորված   վարկածներից  բացի (որոնցից է, օրինակ,  ժամանակակից պարսկերենում    xushe  տեսքով հանդես եկող  իրանական աղբյուրից փոխառյալ  xushak տարբերակը) այլ մեկնաբանություններ չի տալիս:
Բայց հայերենում, ըստ Աճառյանի ԱՐՄԱՏԱԿԱՆ ու Ջահուկյանի ՍՏՈՒԳԱԲԱՆԱԿԱՆ բառարանների,  կա նաեւ մեկ այլ ԿՈՒՅՍ՝ (դասական ուղղագրությամբ՝ ԿՈՅՍ), որը կարծես կապ չունի   չամուսնացած ու անձեռնամուխ աղջկա կամ  Աստծուն ուխտ արած  հոգեւորականի հետ: Եվ դա «կողմ» իմաստով կույսն է, որը հանդիպում է հայերեն ՔԱՌԱԿՈՒՍԻ (չորս հավասար կողմ ունեցող ուղղանկյուն) , ՄԵԿՈՒՍԱՆԱԼ (մի կողմ քաշվել, առանձնանալ), ԿՈՒՍԱԿՑՈՒԹՅՈՒՆ (կողմնակցություն) եւ այլ բառերի մեջ:

Հետեւաբար,  ավելի արդար  կլինի «ԿՈՒՍԱԿՐՈՆ» բառը   հասկանալ «ՀԱՆՈՒՆ ԿՐՈՆԻ ՄԵԿՈՒՍԱՑԱԾ ԱՆՁ» իմաստով:

ԳՐԻԳՈՐ ԱՌԱՔԵԼՅԱՆ