Ժանգոտած բառեր
Մտքի մեջ ձեւավորվող ասելիքն ավելի մեղմ ու ականջահաճո փաթեթավորումով ներկայացնելու համար բարեկիրթ մարդիկ իրենց խոսքը ենթարկում են հատուկ մշակման, որը կոչվում է մեղմասացություն կամ էվֆեմիզմ:
Այլ կերպ ասած՝ անքաղաքավարի ու «ժանգոտած» բառուբանի փոխարեն հասարակության առավել նրբանկատ հատվածը գերադասում է օգտագործել ավելի վայելուչ հոմանիշներ:
Հիմք ընդունելով այդ իրողությունը՝ բարեկրթության դժվարանցելի ճանապարհը հաղթահարողներին առաջարկում ենք եթերից հնչող հետեւյալ անհարմար ու կոպիտ արտահայտությունների ու բառերի փոխարեն օգտագործել դրանց մեղմահունչ տարբերակները՝
«Մորթել» բայի փոխարեն՝ «պատժել»,
«Ասֆալտին փռել» արտահայտության փոխարեն՝ «կարգի հրավիրել»,
«Պատերին ծեփելու» փոխարեն՝ «սանձահարել»,
«Թաթիկները կտրելու» փոխարեն՝ «հայրաբար դաստիարակել»,
«Գյամերը քաշելու» փոխարեն՝ «կշտամբել»,
«Ցխել» բայի փոխարեն՝ «հանդիմանել»,
«Պզզցնելու» փոխարեն «ջրել»,
«ճռիկ-վռիկներ»-ի փոխարեն՝ «ինքնադրսեւորում»,
«Խվա՜յ» ձայնարկության փոխարեն «ի՜նչ անուշ է» ,
«Էշի ճակատը պաչել» դարձվածքի փոխարեն՝ «գլխին չտալու համար Ճիշտ քաղաքական ընտրություն կատարել» արտահայտությունը:
ԳՐԻԳՈՐ ԱՌԱՔԵԼՅԱՆ
