Մարտի 12-ին մի խումբ թուրք լրագրողներ այցելեցին Հայաստան: Նրանք եղան թուրքական սահմանի հայկական հատվածում, տեղում ուսումնասիրելեվ Մարգարա անցակետում կատարվող աշխատանքները, ապա հանդիպեցին հայ պետական գործիչներին եւ հարցազրույց վերցրեցին ՀՀ վարչապետ Նիկոլ Փաշինյանից: Ադրադառնալով «Ազգ» շաբաթաթերթի նախորդ համարում թուրք լրագրողների այցին` զարմանքով նշել էինք, որ թուրքական թերթերը Հայաստան թղթակիցներ գործուղում են, սակայն չգիտես ինչո՞ւ այցի մասին նրանց պատրաստած նյութերը հրապարակելու համար սպասում են, որ նախապես հրապարակվի Փաշինյանի հարցազրույցը:
Ընդդիմադիր մամուլն ու կուսակցական գործիչները, փոխանակ թուրք լրագրողների այցը լուսաբանելու կամ գնահատելու դրա արյունքների հնարավոր ազդեցությունը մեր հանրապետության վրա, շտապեցին աղաղակել, թե այցի ծախսերը հոգացել ենք պետբյուջեի հաշվին, որոնք կազմել են 7.5 մլն դրամ, եւ սա` առաջին դեպքն, երբ Հայաստանը իր հաշվին թուրք լրագողներ է հրավիրել մեր երկիր, ընդ որում ընդգծելով, թե հրավիրողը հայկական կողմն է: Եթե հայկական կողմն է հրավիրել, տրամաբանական է, որ ինքն էլ պետք է հոգար այցի ծախսերը:
Խնդիրը սակայն սոսկ այցի ծախսերը չեն, այլ թուրք լրագրողներին ՀՀ վարչապետի վրա ծիծաղելիս տեսնելու հայաստանյան ընդիմության մոլուցքը: Հետեւաբար մենք տվյալ դեպքում գործ ունենք ոչ այնքան իրողության, այլ ընդդիմադիր ուժերի անհիմն ցանկատեսության հետ, ինչի մասին վկայում են հենց թուրքական թերթերը:
Օրինակ` «Թյուրքիյե» թերթը մարտի 12-ին ՀՀ վարչապետի խնդրո առարկա հարցազրույցին «Փաշինյանն ի՛նչ ասաց թուրք լրագրողներին. ցնցող մանրամասներ հայկական մամուլից» խորագրով անդրադառնալիս նշում էր. «Հայաստանում հրատարակվող «Հրապարակ» թերթի համաձայն, երեկ սոցցանցում վարչապետ Փաշինյանը տեղեկացրել է, որ հարցազրույց է տվել թուրքական մամուլի ներկայացուցիչներին: Ըստ հայկական թերթի, ՀՀ վարչապետը սերտ հարաբերությունների մեջ է Թուրքիայի նախագահ Ռեջեփ Թայիփ Էրդողանի հետ եւ աշխատում է Ռուսաստանի ազդեցությունից փրկվելու համար ուժեղացնել հարաբերությունները թուրքական պետության հետ: Ավելին, ինչպես պնդում է նշված թերթը,ՀՀ վարչապետը Եվրոպայի հետ հարաբերություններն ամրացնելու մղումով Թուրքիայից աջակցություն է ակնկալում»:
Մարտի 13-ին Ռազմավարական մտքի ինստիտուտի կայքէջը՝ https://www.sde.org.tr-ն «Հաջորդական հրաշալի լուրեր Բաքվից ու Երեւանից. Փաշինյանն ասաց, որ Թուրքիայի հետ նորմալացումը պահի խնդիր է» խորագրով է անդրադարձել հարցազրույցին եւ առանձնացրել ՀՀ վարչապետի հետեւյալ արտահայտությունները.
-Հայաստանի եւ Թուրքիայի դիվանագիտական ներկայացուցիչներն մշտապես ուղղակի շփումների մեջ են,
-Պատմության մեջ չկա բացարձակ ճշմարտություն, կա դրա ընկալումը, որն իրականում որպես այդպիսին քաղաքական ընկալում է,
– Այդ հարցի (1915-ի իրադարձությունների ) միջազգային ճանաչումը ներկայումս մեր արտաքին քաղաքականության առաջնահերթությունը չէ,
– (Հայաստան-Թուրքիա հարաբերությունները) Դրանց նորմալացումը կարող է տեւել երեք ամիս, վեց ամիս կամ էլ մեկ տարի: Սակայն իմ ըմբռնմամբ դա արդեն ժամանակի հարց է, ուստի համբերությամբ պետք է առաջանանք:
Մարտի 18-ին հարցին անդրադարձել է նաեւ ընդդիմադիր Ժողովրդա-հանրապետական կուսակցության խոսափող «Ջումհուրիյեթ» թերթը, դիտարկելով թուրք լրագրողների այցը «Անկարա-Երեւան նորմալացման պատեհ առիթ» վերնագրի ներքո: Սակայն այս թերթը որպես հարցին անդրադառնալու միջոց նախընտրել է հարցազրույցի խնդրանքով դիմել մեր հայրենակից Ռիչարդ Կիրակոսյանին: Այդ իսկ պատճառով հարկ չենք համարում առանձին անդրադառնալ հարցազրույցին:
Այնուամենայնիվ թուրք լրագրողների մոտեցումը Հայաստան այցին, առավել եւս ՀՀ վարչապետի հետ հարցազրույցին, միանգամայն դրական է, նրանց այս մոտեցում ինքնին հակասում է հայաստանյան ընդդիմության թուրք լրագրողներին վերագրած հետեւությանը, թե վերջինները ծաղրել են Փաշինյանին:
ՀԱԿՈԲ ՉԱՔՐՅԱՆ
Թուրքագետ
