Երուսաղեմի պատրիարքությունը չեղյալ է հայտարարել «Կովերու պարտեզ»ի համաձայնագիրը

Նոյեմբերի 1-ին Երուսաղեմի Հայոց պատրիարքությունը տարածել է հայտարարություն, ըստ որի տեղեկացնում է, թե նամակ է ուղարկվել Xana Gardens Ltd ընկերությանը, որով չեղյալ է համարում Երուսաղեմի Հին քաղաքի հայկական թաղամասի «Կովերու պարտեզ» կալվածի վերաբերյալ 2021 թ.ի հուլիսի 8-ին ստորագրված համաձայնագիրը:

Սրա մասին հայտնել է Երուսաղեմի Հայոց պատրիարքության դիվանապետ, հոգեշնորհ Տ. Աղան աբեղա Գոքչյանը: Հիշեցնենք, որ 2023-ի տարեսկզբին Սուրբ Աթոռի կալվածքների տեսչի պաշտոնից ազատվել էր Պարետ Ծ. վարդապետ Երեցյանը, որը պատասխանատու էր այդ գործարքի համար: Այս տարվա մայիսի 6-ին վերջինս կարգալույծ է արվել՝ կալվածքի համաձայնագրում թույլ տված մի շարք խարդախությունների եւ խաբեբայությունների համար:

ՀԱԿՈԲ ԱՍԱՏՐՅԱՆ

Պրահա