Ուսանողներին հայրենասիրական ոգով դաստիարակելու գործում հսկայական աշխատանքներ են կատարվում Պլեխանովի անվան ռուսական տնտեսական համալսարանի երեւանյան մասնաճյուղում: Վերջերս տեղի է ունեցավ Արցախյան 44-օրյա պատերազմի նահատակների տարելիցին նվիրված հիշատակի միջոցառում: Միջոցառման մասնակիցները մեկ րոպե լռությամբ հարգեցին զոհված զինվորների հիշատակը, որոնց թվում էին նաեւ համալսարանի ուսանողները. ԱԲՐԱՀԱՄՅԱՆ ՍԵՐԳԵՅ, ՀԱՅՐԱՊԵՏՅԱՆ ԷԴԳԱՐ, ԹԱԴԵՎՈՍՅԱՆ ԱՐԱՄԱՅԻՍ, ԵՐԿԱՆՅԱՆ ՍԵՆՈ, ՆԱԼԲԱՆԴՅԱՆ ԲԵՆԻԱՄԻՆ:
Մասնաճյուղի տնօրեն, պ.գ.թ. Թ. Վարդանյանը հանդես եկավ ելույթով, որում հարգանքի տուրք մատուցեց հերոսներին եւ ընդգծեց պատմական հիշողության պահպանման կարեւորությունը, հայ ժողովրդի ոգու եւ միասնության ամրապնդման գործում:Միջոցառումն ավարտվեց խորհրդանշական ներկայացմամբ, որը եւս մեկ անգամ ցույց տվեց հայ ժողովրդի տոկունությունն ու արիությունը:
Հարկ է նշել նաեւ, որ օրերս Սոչի քաղաքում միջազգային օլիմպիադայում համալսարանի ուսանողներից երեքը բարձր պահեցին մեր երկրի պատիվը եւ 36 երկրների 600 մասնակիցների մեջ նվաճեցին 2-րդ հեղինակավոր մրցանակը:
Պլեխանովի անվան ռուսական տնտեսական համալսարանի երեւանյան մասնաճյուղի ուսանողներն արդեն 3-րդ տարին է, ինչ մասնակցում են Ֆինանսական անվտանգության միջազգային օլիմպիադային եւ պատվավոր տեղ զբաղեցնում օլիմպիադաներում: Հաջողություն ցանկանանք նրանց:
ՍՏԵՓԱՆ ՊԱՊԻԿՅԱՆ
