«…Ե՞րբ է գարունն այս դառնալու ամառ…»

Վահագն Դավթյանի 100-ամյակին նվիրված միջոցառում Հայաստանի գրողների միությունում

Մի առիթով անվանի բանաստեղծն ասել է. «Իսկական բանաստեղծ լինելու եւ հարատեւելու համար բավական չէ լավ, նույնիսկ շատ լավ բանաստեղծությունների հեղինակ լինելը»:

Օրեր առաջ Հայաստանի գրողների միությունում տեղի ունեցավ Վահագն Դավթյանի 100 ամյակին նվիրված միջոցառումը :

Բացման խոսքով հանդես եկավ Հայաստանի գրողների միության նախագահ  Էդվարդ Միլիտոնյանը` խոսելով  Վահագն Դավթյանի կյանքից, ստեղծագործական ուղուց:

«Վահագն Դավթյանի լավագույն  գործերը մինչ օրս զնգում են մարդկանց ականջներում»,- ասում է  Էդվարդ Միլիտոնյանը:

«Պոեզիան ամենից առաջ սերն է` ճշմարտության, արդարության, ներդաշնակության, գեղեցկության, սեր՝ դեպի անհայտը, գաղտնին, խորհրդավորը»  այսպես է արտահայտվել Վ. Դավթյանը պոեզիայի մասին:

Հայաստանի վաստակավոր արտիստուհի Սիլվա Յուզբաշյանը, որ երկար տարիներ եղել է գրողի կողքին, նախաձեռնել եւ հրատարակել է  նրա  արձակ եւ չափածո գործերը, այսօր էլ ասմունքում դրանք: Ներկաները հնարավորություն ունեցան ունկնդրելու եւ վայելելու նրա ասմունքը:

Միջոցառման ընթացքում ընթերցվում էին Վ. Դավթյանին նվիրված այն բոլոր խոսքերը , մտքերը եւ նամակները , որոնք գրվել են  հայտնի գրողների, այդ թվում Գուրգեն Մահարիի ու Հրանտ Մաթեւոսյանի եւ պարզապես այն մարդկանց կողմից, ովքեր ճանաչում էին  Վահագն Դավթյանին: 

Իրենց երախտագիտական խոսքով հանդես եկան նաեւ գրող ,  թարգմանիչ, հրապարակախոս Գրիգոր Ջանիկյանը, արձակագիր եւ  բանաստեղծ Լեւոն Բլբուլյանը, բանաստեղծ Խաչիկ Մանուկյանը եւ արցախցի բանաստեղծ Սերժ Մկրտչյանը:

Միջոցառման վերջում երաժիշտ եւ երգիչ Ռուբեն Բագրատունին կիթառային մի քանի կատարում նվիրեց Վահագն Դավթյանի 100-ամյակին:

ՄԱՆԵ ՏԻԳՐԱՆՅԱՆ

ԵՊՄՀ Լրագրության 2-րդ կուրս