Մարտի 18-ին Սամարայի ֆիլհարմոնիայում տեղի ունեցավ «Հավերժության շունչը» խորագրով համերգ, որին մասնակցում էին երգեհոնահար, Բաշկորտոստանի Հանրապետության ժողովրդական արտիստ Վլադիսլավ Մուրտազինը եւ դուդուկահար Արգիշտին Սանկտ Պետերբուրգից: Երաժիշտները կատարել են Բախի, Ալբինոնիի, Պախելբելի, Շուբերտի, Ջազոտտոյի, Վավիլովի ստեղծագործություններից, նաեւ հայկական ժողովրդական եղանակներ, Թումանյանի «Ախ ինչ լավ են» երգը եւ Արգիշտիի հեղինակած գործերից: «Երաժշտության արքա» անվանվող հզոր երգեհոնի եւ մանրանկարային, մեղմահունչ դուդուկի համակցությունը անսպասելիորեն ներդաշնակ են: Համերգը կազմակերպել է «Պուշկինյան քարտեզ» նախագիծը:
«Դուդուկի ձայնին ականջալուր են լինում միայն նրանք, ովքեր իսկապես հետաքրքրված են սեփական հոգու կյանքով»,- ասում է դուդուկահար եւ երգահան Արգիշտին (Հարությունյան): Սանկտ Պետերբուրգում ստանալով ակադեմիական երաժշտական կրթություն՝ նա ուսումը շարունակել է Երեւանի կոնսերվատորիայում, աշակերտել մեր ժամանակների լավագույն դուդուկահարներից Գեւորգ Դաբաղյանին: Մենահամերգներով հանդես է գալիս 2008 թվականից: Արգիշտին կատարում է ինչպես Հայաստանի եւ Արեւելքի հայտնի ժողովրդական մեղեդիներ, այնպես էլ սեփական ստեղծագործությունները: Մշտապես մասնակցում է էթնիկ փառատոների, մասնավորապես՝ Մոսկվայի դուդուկի ամենամյա փառատոնին: Նրա կատարմամբ դուդուկի երաժշտություն է հնչել բազմաթիվ ռուսական կինոնկարներում: Մենահամերգներով եւ տարբեր երգեհոնահարների հետ համատեղ հանդես է եկել Ռուսաստանի բազմաթիվ քաղաքներում, նաեւ Վիլնյուսում եւ Ռիգայում: Ապրիլի 3-ին Արգիշտին Սանկտ Պետերբուրգում հանդես է գալու «Ծիրանի ջազ» համերգում՝ «Պալ մունդո» տրիոյի հետ համատեղ:
Ա. Բ.
