2022 թվականի մարտի 21-ին Հայաստանի Գրողների Միությունում տեղի ունեցավ Եղիշե Չարենցի ծննդյան 125 ամյակին եւ պոեզիայի միջազգային օրվան նվիրված միջոցառում: Ներկա էր Երեւանի կենտրոն վարչական շրջանի ղեկավար Ավետ Պողոսյանը, Ե. Չարենցի տուն-թանգարանի տնօրեն Ժաննա Մանուկյանը, մեծ պոետի թոռնուհի Գոհար Չարենցը, ՀԳՄ նախագահ Էդվարդ Միլիտոնյանը, բանաստեղծներ, գրողներ, մշակութային գործիչներ:
Միջոցառումն ամբողջությամբ բանաստեղծական էր, եւ ներկաներն էլ միմյանց լրացնելով խոսեցին հայ պոեզիայից, Չարեցնի ահռելի ներգործությունից, իսկ հյուրերը՝ տարբեր ազգությունների ներկայացուցիչներ, ասմունքեցին բանաստեղծի հայտնի գործերից թարգմանություններ: Միջոցառմանը ներկա էին դիվանագիտական հաստատությունների եւ ազգային փոքրամասնությունների, մշակութային կենտրոնների ներկայացուցիչները, ովքեր ընթերցեցին Եղիշե Չարենցի «Ես իմ անուշ Հայաստանի» բանաստեղծության տողերը տարբեր լեզուներով եւ իրենց տպավորություններով կիսեցին հանդիսատեսի հետ:
Ելույթ ունեցան Հայաստանում Սերբիայի Պատվավոր հյուպատոս Բաբկեն Սիմոնյանը, Երեւանում «Մոսկվայի տուն» մոսկովյան մշակութագործարարական կենտրոնի ներկայացուցիչ Արամ Գյուրջյանը, Հայաստանում Ֆրանսիայի դեսպանատան կրթական եւ համալսարանական համագործակցության կցորդ, համագործակցության եւ մշակութային կապերի ծառայության ներկայացուցիչ Սելին Գուերինը, Չինաստանի Շանդուն նահանգի, Բինձհոու համալսարանի գիտությունների դոկտոր, պրոֆեսոր, հարավկովկասյան հետազոտական կենտրոնի տնօրեն Չի Փեյչենգը, Հայաստանի Հունական համայնքի միության նախագահ Մարիա Լազարեւան, Հայաստանի Հրեական համայնքի նախագահ Ռիմա Վարժապետյանը, Հայաստանի Քրդական համայնքի ներկայացուցիչ Սայրան Խուբոյանը, Վրացական մշակույթի դեսպան, բանաստեղծ-թարգմանչուհի, Հայաստանում «Իվերիա» վրացական համայնքի փոխնախագահ, Վրաստանի գրողների միության անդամ Նինո Սպանդերաշվիլին եւ «ՀԻԿԱՐԻ» հայ-ճապոնական գիտական, կրթական մշակութային կենտրոնի ներկայացուցիչ Արփինե Խաչատրյանը:
Այսօրինակ միջոցառումներն ավելի քան պետք են հիմա, որպեսզի հայը՝ հնագույն ազգերից մեկը, պոեզիայի իր լավագույն ստեղծագործություններով կարողանա շփվել մնացյալ աշխարհի հետ:
ՀԱՅԿ ՍԻՐՈՒՆՅԱՆ
