Մահացել է «Նորամուծության եւ ձեռներեցության ազգային կենտրոն» ՊՈԱԿ-ի Գիտատեխնիկական գրադարանի երկարամյա ղեկավար ԼԵՎՈՆ ՂԱՐԻԲՅԱՆԸ:
Լեւոն Ղարիբյանը ծնվել է Երեւանում, 1952 թ.: Ավարտել է Երեւանի պետական համալսարանի ֆիզիկայի ֆակուլտետը, դասավանդել է Երեւանի պոլիտեխնիկական ինստիտուտում, ստացել է կենսաբանական գիտությունների թեկնածուի գիտական աստիճան: Աշխատել է ՀԽՍՀ բարձրագույն եւ միջնակարգ մասնագիտական կրթության նախարարության գիտամեթոդական կաբինետում, Երեւանի սննդի արդյունաբերության տեխնիկումում` որպես փոխտնօրեն:
ԵՊՀ ընդհանուր ֆիզիկայի ամբիոնում ստեղծել է հետազոտական լաբորատորիա, եղել է «Իկար» կոոպերատիվի գիտատեխնիկական եւ ինովացիոն հարցերի գծով փոխնախագահ, ստեղծել եւ ղեկավարել է «Հորիզոն 21» ինովացիոն ՍՊԸ-ն: Աշխատել է Ավ. Իսահակյանի անվ. Կենտրոնական գրադարանում` որպես տեղեկատվության եւ տեխնիկայի բաժնի վարիչ:
2002 թ.-ից եղել է Գիտատեխնիկական ինֆորմացիայի եւ տեխնիկական հետազոտությունների հայկական գիտահետազոտական ինստիտուտի Հանրապետական գիտատեխնիկական գրադարանի տնօրեն: 2009 թ.-ից ղեկավարել է ՊՈԱԿ-ի գիտատեխնիկական գրադարանը:
«Լեւոն Ղարիբյանը աշխատանքի եռանդուն կազմակերպիչ էր, գիտնական, գրադարանային ոլորտին եւ իր Գիտատեխնիկական գրադարանին նվիրյալ: Նա համեստ, ազնիվ, առաքինի, ընկերասեր ու հայրենասեր, համեստ ու լավ մարդ էր բառի բուն իմաստով: Շրջապատի հանդեպ միշտ զգայուն, բարի ու հոգատար, խստապահանջ ու հանդուրժողական, կարեկից ընկեր… Այդպիսին էր Լեւոն Ղարիբյանը… Հիանալի մարդու լուսավոր հիշատակը միշտ կմնա նրան ճանաչողների սրտերում… Մենք միշտ կհիշենք նրան ու կզգանք մեծ կորուստը…»,- ասված է ՆՁԱԿ ՊՈԱԿ-ի կոլեկտիվի հղած ցավակցականում:
Ցավակցում ենք Ղարիբյանների ընտանիքին, մաղթում նրա հարազատներին տոկունություն ու ոգու ամրություն:
ՍՏԵՓԱՆ ՊԱՊԻԿՅԱՆ
