Մեր ժողովրդի վավերական բարերարներից մեկն էլ հեռացավ կյանքից։ Գառնիկ Եագուպեան. Հայկական բարեգործական ընդհանուր միության, Մայր աթոռ Սբ. Էջմիածնի, Մեծի տանն Կիլիկիո կաթողիկոսության, Հայաստանի հանրապետության, բազմաթիվ երիտասարդների մասնագիտական կրթության եւ մի շարք այլ կառույցների եւ այլ բնագավառների նեցուկ ու ջատագով անձնավորություն, որի կորուստը առաջինը գուժեց ՀԲԸՄիությունը, որի ղեկավարության անդամ էր երկար տարիներ։
Ծնվել էր Սիրիայում, շինարար-ճարտարապետի կրթությունն ստացել Բեյրութի Ամերիկյան համալսարանում, մինչեւ սիրիական պատերազմը բնակվում էր Դամասկոսում, որտեղ հիմնել էր այդ երկրի ամենամեծ ճանապարհաշինական ընկերությունը։ Խորապես ազգային մարդ՝ հայության եւ հայոց հայրենիքի, նաեւ Հայ եկեղեցու բարօրության աղբյուրը համարում էր կրթությունը։ Ահա թե ինչու նրա բարեգործությունների հիմնական թիրախը հայոց կրթարաններն էին՝ Հայաստանի գիտա-բժշկական գրադարանում ուսումնական կենտրոնի հիմնադրում, Սեւանի Վազգենյան դպրանոցի կառուցում, Բիքֆայայում (Լիբանան) Տանն Կիլիկիո կաթողիկոսության դպրեվանքի եւ Անթիլիասում հոգեւոր ճեմարանի հիմնում։ Նա, անշուշտ, Սիրիայում, Լիբանանում, Կանադայում, Հայաստանում թե այլուր նպատակային այլ բարերարություններ, հիմնանորոգումներ էլ է արել, բայց հիմնականում նրա սեւեռակետը եղել է կրթությունը, հայ երիտասարդների կրթության ծարավը հագեցնելը։
«Ազգ»ը ցավակցում է Եագուպեան մեծ գերդաստանի անդամներին, ինչպես նաեւ ՀԲԸՄիության ղեկավարությանը։
