«Եթե սա ցեղասպանություն չէ, ի՞նչ է», Գազայում Իսրայելի գործողությունների մասին կարծիք է հայտնում հրեա լրագրող, «Հաարեց» թերթի հրատարակիչ Գիդեոն Լեւին (Gideon Levy), որ «Բեռլիներ ցայթունգի» հետ հունիսի 15-ի հարցազրույցում մարդկության դեմ այս ոճիրը դատապարտելով զգուշացնում է նաեւ Իսրայելի հասարակության բարոյական անկման մասին: Գազայում 20 ամսից ավելի պատերազմի շունչն է, եւ ՄԱԿ-ի տվյալներով իսրայելական հարձակումների պատճառով նվազագույնը 50 000 մարդ է զոհվել: Պաղեստինյան տարածքներում արգելափակել են օգնության տրամադրումը, եւ սովը սպառնում է զոհերի թիվն ավելացնել:
«Հաարեց» օրաթերթում Լեւիի սյունակները կարդացվում են մեծ հետաքրքրությամբ: Գերմանապաղեստինյան ընկերակցությունն իր կայքում տեղադրել է Գիդեոն Լեւիի՝ մայիսի 29-ին հրապարակած հոդվածը, որ ներկայացնում ենք համառոտելով:
«Անկախ նրանից, թե ինչ է անում Իսրայելը, Գերմանիայում դժվար է, նույնիսկ անհնար նրան քննադատելը: Սա բարեկամություն չէ, սա անցյալին ստրկանալ է եւ Գազայի իրադարձությունների պատճառով պիտի վերջ գտնի: «Հատուկ հարաբերությունները» չեն կարող ներառել ռազմական հանցագործությունների հաստատման կնիք: Գերմանիան իրավունք չունի անտեսելու իր հանցագործություններին ի պատասխան ստեղծված Միջազգային քրեական դատարանը՝ քննարկելով, թե ե՞րբ հրավիրել ռազմական հանցագործությունների համար հետախուզվող Իսրայելի վարչապետին: ԳԴՀ իրավունք չունի կրկնելու անցյալի կլիշեները, ծաղիկներ դնելու Յադ Վաշեմում, որը Խան Յունիսից 90 րոպե հեռավորության վրա է: Գերմանիան այժմ Հոլոքոստից ի վեր իր ամենամեծ բարոյական փորձության առջեւ է: Վլադիմիր Պուտինի՝ Ուկրաինա ներխուժելուց մի քանի շաբաթ անց, հենց Գերմանիան էր գլխավորում ՌԴ-ի դեմ պատժամիջոցները: Գազա ներխուժելուց քսան ամիս անց Գերմանիան դեռեւս որեւէ գործողություն չի ձեռնարկել Իսրայելի դեմ, բացի նույն ձեւական խոսքերից, ինչ մյուս եվրոպական երկրները:
Գերմանիան պետք է փոխվի՝ ոչ թե իր անցյալին հակառակ, այլ դրա պատճառով: Բավարար չէ, երբ կանցլեր Ֆրիդրիհ Մերցն ասում է, թե Գազայի հատվածի ռմբակոծությունն այլեւս արդարացված չէ: Նա պետք է միջոցներ ձեռնարկի, որոնք կօգնեն դադարեցնել այն: ԱԳ նախարար Վադեֆուլի ասածն էլ բավարար չէ ( Գերմանիան թույլ չի տա իրեն «հայտնվել այնպիսի իրավիճակում, երբ ստիպված կլինենք ցուցաբերել պարտադրված համերաշխություն») Ժամանակն է, որ Գերմանիան համերաշխություն ցուցաբերի զոհերի հետ, ազատվի անցյալի կապանքներից, որոնք օտարում են նրան Հոլոքոստի դասերից: Գերմանիան այլեւս չի կարող անգործ մնալ եւ բավարարվել միայն գաղջ դատապարտումներով:
Գազայում տիրող սարսափելի իրավիճակի առջեւ սա Գերմանիայի ամոթալի լռությունն է»:
ԱՆԱՀԻՏ ՀՈՎՍԵՓՅԱՆ
Գերմանիա
Լուսանկարը՝ «Բեռլիներ ցայթունգի», հեղինակ՝ Rahim Khatib/imago«Գազան սովի ճիրաններում»
