ՀՀ Գիտությունների ազգային ակադեմիայի Հրաչյա Աճառյանի անվան լեզվի ինստիտուտը լույս է ընծայել «Բայազետի բարբառի բառարան» աշխատանքը, որի հեղինակն է ինստիտուտի տնօրեն, բանասիրական գիտությունների դոկտոր Վիկտոր Կատվալյանը: Այն ընդգրկում է Բայազետի (այժմ՝ Գավառ) բարբառի շուրջ 8 000 բառային միավոր, դարձվածք եւ ոճ: Բառարանի յուրաքանչյուր բառահոդված պարունակում է գլխաբառը եւ նրա բացատրությունը, քերականական տեղեկություններ, որպես կանոն`տվյալ բառով բարբառային խոսքի օրինակ: Օրինակները բարբառային խոսքի նմուշներ են, ասացվածքներ, դարձվածքներ, հաճախ էլ բերված նմուշները բովանդակային կապ ունեն եւ պատումներ են ձեւավորում: Բառարանը տեղեկություններ է պարունակում նաեւ բարբառակիր հանրության կենցաղի, առօրյայի, սովորույթների, պատկերացումների, աշխարհընկալման վերաբերյալ: Բարբառային խոսքը ներկայանում է իր կենդանի գործածությամբ:
Գլխաբառերը եւ դրանք պարունակող նմուշները բերվում են բարբառային տառադարձությամբ:Բառարանը օգտակար կլինի լեզվաբաններին, բարբառագետներին, ազգագրագետներին, բանահյուսության մասնագետներին, կարող է օգտագործվել բուհական դասընթացներում:
ՍՏԵՓԱՆ ՊԱՊԻԿՅԱՆ
