Լոս Անջելեսի Կալիֆոռնիա համալսարանի (UCLA) «Խոստում հայկական ֆակուլտետում» (Promise Armenian Institute) համանուն ֆիլմի ցուցադրումից հետո պատասխանատուները պրոֆ. Թաներ Աքչամին նշանակել են հիմնադիր-տնօրեն ֆակուլտետում գործող Հայոց ցեղասպանության ուսումնասիրության ծրագրի, որը հնարավորություն է տալու այդ բնագավառի գիտնականներին եւ շրջանավարտ ուսանողներին ծավալելու ակադեմիական հետազոտություններ: Ծրագիրը հնարավոր է եղել սկսել համալսարանում բարերար Քըրք Քըրքորյանի թողոնից ստացված 20 միլիոն դոլարի առատաձեռն նվիրատվության շնորհիվ: Աքչամը սերտորեն համագործակցելու է ֆակուլտետի հիմնադիր տնօրեն, ճարտարագիտության ճանաչված պրոֆեսոր Աննա Կարագյոզյանի հետ:
Թաներ Աքչամը ցեղասպանագիտության բնագավառի ականավոր մասնագետ է ծնված Թուրքիայում, որը բազմակողմանիորեն է լուսաբանել Հայոց ցեղասպանությունը ընդհանրապես եւ Թուրքիայի վարած ժխտողականության հետ առնչվող հարցերը, հիմնվելով Օսմանյան եւ այլ աղբյուրների (այդ թվում նաեւ ռազմական եւ դատական) տեղեկությունների վրա: Հեղինակ է 10 գրքի, ներառյալ 2006-ին լույս տեսած «A Shameful Act»ը (Խայտառակ արարք: Հայոց ցեղասպանությունը եւ թուրքերի պատասխանատվության հարցը, Երեւան, 2021 թ.) եւ «Killing Orders»ը (Սպանության հրամաններ: Թալեաթ փաշայի հեռագրերն ու Հայոց ցեղասպանությունը, Երեւան, 2019 թ.): Շուտով լույս կտեսնի նրա «Օսմանյան կայսրությունում քրիստոնյա բնակչության ցեղասպանությունը եւ դրա հետեւանքները (1908-23)» վերնագրով հերթական հատորը:
Վաստակաշատ պրոֆեսորն այժմ աշխատում է «Թուրքիայում հայերից թալանված կամ բռնագրավված ունեցվածքները», «Դերսիմի 1938-ի ցեղասպանությունը», «Օսմանյան ուշ շրջանի մամուլի լուսաբանումները» թեմաների վրա:
Հ.Ծ.
