Արցախի պետնախարար Ռուբեն Վարդանյանի՝ օրերս արած հայտարարությունից հետո, թե Ամանորի օրերին ունեւոր մի ընտանիք, կապերն օգտագործելով, կարողացել է հանգստի մեկնել, Արցախում (նաեւ Հայաստանում) բոլորը ցանկանում են իմանալ՝ ո՞վ է այդ անձը, որ ցանկացել է ի ցույց դնել իր՝ բոլորից բարձր լինելու առավելությունը: «Ազգ»ի արցախյան աղբյուրները Վարդանյանի հայտարարությունը ոչ դրական են գնահատում: «Տպավորություն է, որ մարդկանց ասում է՝ գնացեք, գտեք՝ ով է «սեւ ագռավն» ու պատժեք նրան: Եթե նման բան է եղել, ապա թող անուն տար, ոչ թե անհասցե խոսեր: Նույնկերպ նաեւ Փաշինյանն էր խոսում պատերազմի ժամանակ ու հետո, թե «ինչ-որ մի զինվորական նման բան է արել»: Ախր այս օրերին էդ մասին խոսելու ժամանա՞կն է: Հիմա Արցախում մարդիկ, սոցիալական, անվտանգային հարցերը թողած, փորձում եմ գտնել հանգստի մեկնածին»,- ասաց մեր զրուցակիցը:
Արցախում շրջանառվող վարկածներից մեկն, օրինակ, այն է, որ «ունեւոր անձը» կարող է ուղղակի կապ ունենալ Արցախի անվտանգության նախկին քարտուղար Վիտալի Բալասանյանի հետ, ու գուցե այդ պատճառով է նա հրաժեշտ տվել պաշտոնին: Այդ մասով Բալասանյանի թիմակիցները «Ազգ»ի հետ զրույցում մեկնաբանություն չարեցին: Մեկնաբանություն չարեցին նաեւ Արցախի նախագահ Արայիկ Հարությունյանի թիմակիցները, թե հնարավո՞ր է արդյոք՝ «ունեւոր» ընտանիքը նախագահի հովանու ներքո է լքել Արցախը: Համենայնդեպս, Արցախում մինչեւ այսօր բոլորը «սեւ ագռավին» են որոնում, բայց ադպես էլ չեն գտնում:
Արցախյան մեր աղբյուրեը հայտնում են նաեւ, որ թեեւ այս օրերին քաղաքական դաշտի խաղացողները փորձում են զսպվածություն ցուցաբերել, բայց այն, որ իշխանության ներսում խիստ անհամաձայնություններ կան, ակնհայտ է:
ՍԵՎԱԿ ՎԱՐԴՈՒՄՅԱՆ
