Մեկնարկային գինը՝ 20 մլն. դոլար
Աշխարհահռչակ նկարիչ Արշիլ Գորկիի «Ածխացած սիրահարները 1» (1946 թ.) կտավը այսօր, նոյեմբերի 10-ին, աճուրդի է հանվելու Նյու Յորքում, Christies աճուրդի տանը, «20-րդ դարի արվեստ» անվանակարգով: Փորձագետները, ինչպես տեղեկացնում է մեզ մեր քույր հրատարակության՝ «Պայքար»ի խմբագրությունը, հիշյալ գործի մեկնարկային գինը նշանակել են 20 մլն. դոլար: Մեկուկես մետր բարձրությամբ կտավը այդ եւ, հավանաբար, ավելի բարձր գնով վաճառվելու դեպքում դառնալու է Գորկու գործերին ցարդ տրված ամենաբարձր գինը: Նախորդը՝ Գորկու «Բարի օր, տիկին Լինքոլն» կտավը (1944 թ.), դարձյալ Christies-ում, 2018-ի վաճառվել էր 14 մլն. դոլարով:
Աճուրդի տունը Գորկու կտավը ներկայացրել է «Ամենահիասքանչ փյունիկ» վերտառության ներքո, նկատի ունենալով Վանի Խորգոմ գյուղում ծնված Արշիլ Գորկու՝ Ոստանիկ Ադոյանի թշվառ պատանեկությունը, Մեծ Եղեռնից մազապուրծ՝ Արեւելյան Հայաստան հասած, ապա Ամերիկա տեղափոխված նկարչի դժվարին կյանքը: Առասպելական փյունիկ թռչուն՝ իսկապես մոխիրներից հառնած:
