Նունե Վարդանյանի «Անցյալի ստվեր» անհատական ցուցահանդեսը բացվեց ապրիլի 3-ին, Նարեկացի Արվեստի Միությունում: Արվեստագետը հիմնականում մանրանկարների կրկնօրինակումներ է կատարում, սակայն այդտեղ էլ զգացվում է նրա ուրույն ձեռագիրը, ստեղծագործում է աբստրակտ-կուբիստական ուղղություններով: Այս ցուցադրությունում ներկայացված են Նունե Վարդանյանի «հիբրիդային» աշխատանքները, որտեղ արվեստագետը մանրանկարչությունը համադրում է նոր արվեստի հետ՝ «հին կրոնը» ներկայացնելով ժամանակակից գեղանկարչության լեզվով: Արվեստագետն անդրադառնում է քրիստոնեական պատկերագրության ամենատարբեր մոտիվներին՝ պատկերելով հիմնականում նորկտակարանային պատմություններ:
Ցուցադրությունում ներկայացված է տասը աշխատանք: Ոսկեզօծ ֆոնին իշուկի վրա նստած Քրիստոսն է («Մուտք Երուսաղեմ»), կապտամոխրագույն ֆոնին հրեշտակը ձեռքը դրել է Մարիամի ուսին, որ մեղմացնի նրա երկունքի ցավերը: Ձախ պատի երեք աշխատանքները գծանկարային են եւ միայն ֆոնի որոշակի հատվածներում է օխրա նկատվում:
Ժամանակակից արվեստում քրիստոնեական թեմաներին ոչ այնքան հաճախ են անդրադառնում, ուստի նման ցուցադրությունները, ինչպես նաև միջնադարյան արվեստի ժամանակակից պատկերումն այն բացն է, որը Նունե Վարդանյանը լրացրել է իր «Անցյալի ստվեր» ցուցադրությամբ:
ՀՐԱՉՅԱ ԳԱԼՍՏՅԱՆ
