Վերահրատարակվել է պատմական կարեւոր վկայություն՝ «Հայաստանի պատմական քարտեզագրության ատլասը»
Հայաստանի Թեքեյան Մշակութային Միության նախաձեռնությամբ եւ բարերար Ռուբեն Գրիգորյանի մեկենասությամբ վերահրատարակվել է «Հայաստանի պատմական քարտեզագրության ատլաս» մեծածավալ ժողովածուն: Այն կազմված է 300-ից ավելի քարտեզներից: Հեղինակը ֆրանսահայ քարտեզագետ, աշխարհագրագետ, Ֆրանսիայի «Պատվո լեգեոնի» շքանշանակիր Զատիկ Խանզադյանն է: Բնօրինակը պահվել է Վենետիկի Մխիթարյան միաբանության գրադարանում եւ առաջին անգամ հրատարակվել 1960 թվականին:
Օրերս Թեքեյան կենտրոնում կայացավ այդ բացառիկ աշխատության շնորհանդեսը, որի ընթացքում եզակի աշխատությունը նվիրվեց Հայաստանի բուհական գրադարաններին, հայագիտական կենտրոններին, գիտակրթական հաստատություններին, դեսպանատներին, կտրվեն նաեւ արտերկրի համապատասխան հաստատություններին:
«Ատլաս»-ի բնագիրը ֆրանսերենով է եւ բաղկացած է բացատրական տեքստերից, քարտեզներից եւ նկարներից: 85 տարի անց երկրորդ կյանք ստացած ժողովածուն վերահրատարակվել է ռուսերեն, անգլերեն եւ ֆրանսերեն լեզուներով, որն է՛լ ավելի է մեծացնում պատմական վկայություններն ու ճշմարտությունները հանրայնացնելու եւ տարածելու հնարավորությունը: Օտար լեզուներով հրատարակված քարտեզները վառ ապացույցն են, որ հազարամյակներ առաջ Հայաստանը եղել է, հայ ժողովուրդը Հայկական լեռնաշխարհում բնիկ է եւ կարեւորագույն դերակատարում է ունեցել տարածաշրջանում, որտեղ այսօրվա ինքնահռչակ որոշ պետությունների նշույլն անգամ չի եղել:
Ատլասի մեկենաս Ռուբեն Գրիգորյանը վստահ է՝ քարտեզների ժողովածուն պատմական իրողությունների կարեւոր վկայություն է եւ դրա վերահրատարակումը այսօր առավել քան կարեւոր է՝ ցույց տալու, որ հազարավոր տարիներ հայ ժողովուրդն ունեցել է տարածքներ, հայրենիք: Ատլասի խորհրդանշական առաջին օրինակը նա նվիրեց Մխիթարյան միաբանության միաբան Համազասպ վարդապետ Քեշիշյանին:
Քարտեզագրական աշխատանքներն իրականացրել է պատմական գիտությունների դոկտոր Վարդան Մխիթարյանը, որն իր խոսքում կարեւորեց ատլասի վերահրատարակումը հատկապես մեր օրերում, որովհետեւ դրանք ընդգրկում են մարդկության զարգացման բոլոր փուլերը՝ Անտիկ շրջանից մինչեւ 20-րդ դարի կեսերը. այդ բոլոր քարտեզներում հիշատակվել է Հայաստանը:
Նշենք, որ «Ատլաս»-ի վերատպումը հսկայական նշանակություն ունի անցյալի մասին գիտելիքները պահպանելու գործում: Բացի այդ, այն գործուն քայլ է պատմական կեղծարարություններին դիմակայելու գործում. Հայաստանի դարավոր գոյությունը ժխտող, պատմությունը խեղաթյուրող, պատմական քարտեզներն ու վկայություններն աղավաղող օտարազգիները կարող են Զատիկ Խանզադյանի այս աշխատությամբ առերեսվել պատմական ճշմարտության հետ:
