Ազգային ժողովի «Քաղաքացիական պայմանագիր» խմբակցության պատգամավորները շարունակում են պնդել՝ Հայաստանն, այո, պետք է գնա խաղաղության հաստատման ճանապարհով: «Ազգ»ի հետ զրույցում նրանք համոզմունք են հայտնում՝ Հայաստանի գլխին կախված աղետն այս պահին միայն «խաղաղության օրակարգով» կարելի է կլինի կանխել: Այլապես, վստահեցնում են, նոր պատերազմներն անխուսափելի են լինելու:
Իշխանական պատգամավորներից հետաքրքրվեցինք, թե ինչպես հասկանալ այն քաղաքականությունը, որ իրենք մի կողմից դատապարտում են ադրբեջանական վայրագությունները, ասում՝ հայ ռազմագերիներին մասնատող ադրբեջանցի զինովրականները ռազմական հանցագործներ են, բայց մյուս կողմից՝ շարունակում պնդել՝ խաղաղությանն այլընտրանք չկա: «Նախ պետք է տարբերակել խաղաղությունն ու բարեկամությունը: Ոչ ոք չի ասում, թե պետք է բարեկամանալ ադրբեջանցու հետ կամ ջերմ շփումներ ու կապեր հաստատել, նախ որովհետեւ թե՛ մեզ, թե՛ իրենց մոտ վերքերը թարմ են, եւ, երկրորդ, դրանից առաջ իրար հետ դեռ խաղաղ համակեցություն հաստատելու անհրաժեշտություն կա: Մեր խնդիրն այսօր միմյանց հետ կողք-կողքի խաղաղ ապրելն է: Խաղաղությունն, ի վերջո, բարեկամություն չէ, պետք է սկսել այդ երկուսը տարբերակելուց»,- մեզ հետ զրույցում ասաց ՔՊ-ական պատգամավորներից մեկը:
Խաղաղությունն, իսկապես, բացարձակ արժեք է, դրկիցների հետ՝ առանց վեճերի, կռիվների, պատերազմների ապրելը, մեզ համար իրական երազանք, բայց ինչպե՞ս խաղաղ կապրես մի հարեւանի հետ, երբ նրա նպատակը քեզ հում-հում հոշոտելն ու տարածաշրջանից վերջանակապես ջնջելն է: Մաթեւոսյանի ասած. «Բա հազար տարի թշնամուդ հետ ապրես կողք կողքի ու չիմանա՞ս, որ քեզ մորթելու է, ու հոշոտվես հենց քո՞ դռանը…»:
ՍԵՎԱԿ ՎԱՐԴՈՒՄՅԱՆ
Խմբ. կողմից.- Թե ինչպես կարելի է առանց բարեկամանալու խաղաղության հաստատել երկու երկրների միջեւ՝ երեւի միայն իրենք՝ ՔՊ-ական պատգամավորները գիտեն: Սակայն մեր կողմից կարող ենք ՔՊ-ականներին առաջարկել մի այլ տարբերակ, որը համաշխարհային պատմության ընթացքում կիրառվել է մոռանալ «խաղաղություն» բառը, այս պարագայում՝ կեղծիքը, եւ փոխարենը կիրառել «չհարձակման պայմանագիր», որը շատ ավելի պարկեշտ է եւ ընդունելի:
