ՔՊ-ականը Բաքվին հուշում է ականապատման քարտեզները վերցնելու հեշտ տարբերակը

«Առեւտրի առարկա է ամեն ինչ, այդ թվում՝ գերիների փոխանակումը», ասում է իշխող թիմի ներկայացուցիչ, գեներալ-լեյտենանտ Գագիկ Մելքոնյանը, որի քաղաքական առաջնորդ Փաշինյանը դեռ 3 տարի առաջ հայտարարում էր, թե 44-օրյա պատերազմից հետո Բաքվի բանտերում պահվող հայ ռազմագերիներն իրենց կներեն հակառակորդ երկրում մեկ-երկու ամիս ավելի մնալու համար:

Ոչ թե մեկ երկու ամիս, այլ մոտ 4 տարի են ադրբեջանցիների ձեռքին նայում տարբեր իրավիճակներում գերի ընկած մեր հայրենակիցները: Առուծախի նրբություններին տիրապետող իշխանության պատգամավորը նրանց վերադարձի ձգձգման պատճառը կապում է բոլորիս համար ցավոտ մեկ այլ հարցի՝ Բաքվի հնարած միջանցքի հետ: «Դուք կո՞ղմ եք, որ գերիները գան, բայց միջանցք տանք Ադրբեջանին»,- լրագրողների հարցին այսպես է պատասխանում պաշտպանության նախկին փոխնախարարը, որին հարցեր էինք ուղղում Եռաբլուրում՝ Վազգեն Սարգսյանի ծննդյան 65-ամյակի օրը:

Սպարապետի ծննդյան օրը ՔՊ-ական պատգամավորն առիթը բաց չթողեց հերթական անգամ խոսելու ՀԱՊԿ-ին ցտեսություն ասելու, Ռուսաստանից էլ կամաց-կամաց պոչը քաշելու անհրաժեշտության մասին: Ե՞րբ ու ինչպե՞ս. «Ազգ»-ի՝ թեմայի վերաբերյալ հարցերը սակայն չունեցան հստակ արձագանք:

– Երբ Ադրբեջանը մտել էր մեր սահմանները, մենք դիմել էինք ՀԱՊԿ-ին, բայց այդպես էլ պատասխան չստացանք, իսկ երբ Ղազախստանում հեղաշրջում էր, ՀԱՊԿ-ը խումբ ստեղծեց եւ ճնշեց այդ հեղաշրջումը:

– Հայաստանն էլ էր ներգրավված այդ գործողություններում, ճշնողներից մեկն էլ մեր զինվորականներն էին: Եվ, ի դեպ, հենց Փաշինյանի պաշտոնավարման ժամանակ:

– Այո, եւ թաքցնելու բան էլ չկա, ամեն ինչ հրապարակվել է: Պուտինը Ղազախստանում այնպես արեց, որ հեղաշրջում չլինի, մարդիկ չգնան ժողովրդավարության ճանապարհով:
1991-ից սկսած, երբ հակառակորդը մտել էր մեր սահմանները, դիմել էինք ՀԱՊԿ-ին, բայց այդպես էլ պատասխան չենք ստացել՝ անգամ քաղաքական հայտարության տեսքով:

– Այդ մասին դուք եւ թիմակիցները խոսում եք պարբերաբար, բայց խոսքից բացի ոչինչ չեք անում:

– Ամեն ինչ կլինի իր ժամանակին: Առաջ վազել պետք չի, համբերություն ունեցեք, էդ գործողություններն էլ կտեսնեք:

– Դուք իրար եք կապում ռազմագերիների վերադարձն ու Բաքվի՝ այսպես կոչված «Զանգեզուրի միջանցք» ունենալու քմահաճույքը, բայց Ադրբեջանն ամեն գերու համար ականապատ դաշտերի քարտեզ է պահանջում:

– Ղարաբաղը հայաթափած Ադրբեջանը թող գնա եւ այդ քարտեզները վերցնի, դրանք մնացել են Ստեփանակերտում:

ՍԵՎԱԿ ՎԱՐԴՈՒՄՅԱՆ