Կրթական նոնսենս. դպրոցներում գիրք չկա
Նիկոլ Փաշինյանի կաբինետի կողմից երկար ծամծմված ու չարչկված կրթական նոր չափորոշիչը վերջապես դպրոց է մտնում, բայց՝ կիսատ-պռատ: Ոլորտի պատասխանատուն ու քաղաքականություն մշակողը՝ ԿԳՄՍ նախարարությունը, գործը մինչեւ վերջ գլուխ բերել չի կարողացել: Այս տարի կրթական նոր չափորոշիչ ներդրված 2-րդ, 5-րդ եւ 7-րդ դասարաններին մի շարք առարկաների դասագրքերը կտրամադրվեն սեպտեմբեր ամսվա մեջ:
«Դասագրքերի էլեկտրոնային տարբերակները հասանելի են Կրթական տեխնոլոգիաների ազգային կենտրոնի շտեմարանում և ուսուցիչների էլեկտրոնային մատյաններում: Յուրաքանչյուր ուսուցիչ էլեկտրոնային մատյանի համապատասխան էջում կարող է տեսնել էլեկտրոնային դասագրքի հղումը: Դրանք որոշ ժամանակ կփոխարինեն դասագրքերի թղթային տարբերակներին. օգոստոսյան խորհրդակցությունների ժամանակ բոլոր դպրոցների տնօրեններին հանձնարարվել է նոր ստեղծվող դասագրքերի էլեկտրոնային տարբերակներից մի քանի օրվա թեմաների նյութերը տպագրել և տրամադրել աշակերտներին մինչև նոր դասագրքերի տպագրումը: Իհարկե, աշակերտները նույնպես կարող են էլեկտրոնային դասագիրքը ներբեռնել»,- ասում է փոխնախարար Արաքսիա Սվաջյանը:
Ի տարբերություն մնացած առարկաների, որոնք աշակերտները կսերտեն անգույն ու դասագրքի՝ պատճենահանված տարբերակով, օտար լեզուների ու եւս մի քանի առարկաների համար նոր դասագիրք չկա: Դասագրքերի համար հայտարարված մրցույթին մասնակցության հայտ գրեթե չի եղել, եղածներն էլ նախարարության սահմանած նորմերին չեն համպատասխանել ու կտրվել են: Հետեւանքն այն է, որ նշյալ առարկաների ուսուցիչները չգիտեն՝ ինչպես են դասավանդելու առարկան: Թեեւ փոխնախարար Սվաջյանն ունի հարցի պատասխանը, այն է՝ հին դասագրքերով ու նոր չափորոշիչներով, բայց մասնագետների եւ ուսուցիչների համար անհասկանալի է՝ ինչպե՞ս են կազմակերպելու դասապրոցեսը:
Նախարարությունից վստահեցնում են, որ ուսուցիչներին արդեն տրամադրվել են նոր չափորոշիչներով կազմված ուսումնաօժանդակ բոլոր այն նյութերը, որ փորձարկվել են Տավուշի մարզի որոշ դպրոցներում: Մասնագետները սակայն այստեղ եւս տարակարծություն ունեն: «Անհասկանալի է՝ այդ դպրոցներն ինչպե՞ս են «կյանքի կոչել» նոր չափորոշիչը, մանկավարժներն արդյո՞ք գոհ են դրանցից: Եթե հին դասագրքով ենք առաջնորդվելու, բայց որպես հիմք պետք ընդունենք նոր չափորոշիչը, ինչպե՞ս ենք մեկը մյուսին համադրելու»,- սրտնեղեց ուսուցիչներից մեկը:
Կրթության փորձագետ Սերոբ Խաչատրյանն «Ազգ»-ի հետ զրույցում նշում է, որ առնվազն վերջին 25 տարում հանրակրթության ոլորտում նման բան չի եղել, երբ դպրոցն առանց դասագրքի մնա: Ի հակադրություն փոխնախարար Սվաջյանի այն արդարացման, թե 17 տարի նոր դասագիրք չի գրվել ու կրթական նոր չափորոշիչի ներդրմամբ՝ գործընթացը փոքր-ինչ հապաղել է, ասում է. «Դասագիրք գրելու պրոցեսն ուշ է մեկնարկել, մինչդեռ դա պետք էր անել մեկ, մեկուկես տարի առաջ: Սա թերի աշխատանքի հետեւանք է: Ամենասոսկալին սակայն այն է, որ որոշ առարկաների համար նոր գրքեր չկան: Սա էլ հետեւանքն է այն բանի, որ փոքր, շատ փոքր բյուջե են տրամադրում դասագիրք գրելու համար՝ 6 մլն դրամ: Հասկանում եք՝ դա ծիծաղելի, անգամ վիրավորական թիվ է: Դասագրքի վրա աշխատում են ոչ միայն այն կազմողները, այլեւ խմբագիրը, սրբագրիչը, խորհրդատուները, էջադրողը, դիզայներն ու այլք: Մարդիկ, կազմակերպությունները հաշվարկում են, տեսնում են՝ ծախսերը չեն հանի, հրաժարվում են մասնակցել»:
Ի դեպ, նախապես հայտարարվել էր, որ կրթական թարմ չափորոշիչը պետք է ներդրվի նաեւ 10-րդ դասարանում, բայց նոր դասագրքեր չունենալու մասով այստեղ ավելի խայտառակ պատկեր է եղել (ավելի քան 10-ն առարկա գիրք չի ունեցել), ու նախարարությունը որոշել է` 10-րդ դասարանում նոր չափորոշիչը ներդնել հաջորդ տարի:
ՍԵՎԱԿ ՎԱՐԴՈՒՄՅԱՆ
