Թերեւս դա է պատճառը, որ ազդեցության աճի պարագան մտահոգում է ինչպես ԱՄՆ-ին, այնպես էլ Իրանին
Դեկտեմբերի 7-ին եռօրյա պաշտոնական այցով Սաուդյան Արաբիա էր ժամանել Չինաստանի Ժողովրդական Հանրապետություն նախագահ Սի Ծինփինը, արժանանալով շքեղ ընդունելության: Նրա այցը լայն արձագանք էր գտել համայն աշխարհում, հատկապես թագավոր Սալման իբն Աբդուլի հետ ստորագրած «ռազմավարական գործընկերության համապարփակ» համաձայնագիրը, ինչպես նաեւ նրա մասնակցությունը մայրաքաղաք Ռիադում Սաուդյան Արաբիայի, Պարսից ծոցի եւ Եգիպտոսի գլխավորությամբ արաբական երկրների ղեկավարների հետ հրավիրված 3 առանձին գագաթաժողովին: նախագահ Սի Ծինփինի այցն ու առավել եւս նրա մասնակցությունը այդ գագաթաժողովներին Մերձավոր եւ Միջին Արեւելքում Չինաստանի ազդեցության անշեղորեն աճի վկայությունն է, ինչը չի կարող չմտահոգել տարածաշրջանում շահեր հետապնդող մեծ տերություններին եւ տարածաշրջանային պետություններին:
Մեծ տերությունների պարագային խոսքն առաջին հերթին վերաբերում է Միացյալ Նահանգներին: Թերեւս պատահական չէ, որ Վաշինգտոնը հենց ացի օրը աշխարհի վրա ազդելու փորձերի համար մեղադրել էր Չինաստանին, ընդգծելով, թե դրանք չեն փոխի Միջին Արեւելքի նկատմամբ ԱՄՆ որդեգրած քաղաքականությունը: Չինաստան-Պարսից ծոցի համագործակցության խորհուրդի ավարտին հրապարակված համատեղ հայտարարության առթիվ պաշտոնական Թեհրանի մտահոգությունն է արտահայտել Իրանի նախագահ Իբրահիմ Ռայիսին: Դեկտեմբերի 12-ին, «Turk Time»-ի հավաստմամբ, Իրանի նախագահը հայտարարել է. «Վերջին շրջանում Չինաստանի նախագահի տարածաշրջան կատարած այցելությունների ժամանակ քննարկման առարկա դարձած որոշ խնդիրներ մտահոգում են Իրանի ժողովրդին ու իշխանություններին եւ դժգոհություն պատճառ դառնում երկրում»:
Իրանի նախագահի պաշտոնական կայքէջում Ռայիսին Պեկինի վարչակարգին հորդորել է լրջորեն վերաբերվել նման հայտարարություններին բովանդակության առումով: Turk Time կայքի տվյալներով՝ Չինաստան-Սաուդյան Արաբիա համատեղ հայտարարության մեջ, որը Ռիադի հետ կազմել է Սի Ծինփինը, «այլ երկրների ներքին գործերին չմիջամտելու» կոչ է արվում Իրանին: Ծոցի երկրների համագործակցության խորհուրդի հետ Չինաստանի համատեղ հայտարարությունը Արաբական Միացյալ Էմիրություններին «պատկանող» Մեծ Թունբ, Փոքր Թունբ եւ Աբու Մուսա կղզիներին հավակնելու համար զգուշացնում Իրանին, որ գործի միջազգային իրավունքի նորմերին համապատասխան: Քանի որ այդ կղզիներին հավակնում է նաեւ Էմիրությունները, ուստի դրանք կռվախնձոր են դարձել այս երկու երկրների միջեւ:
ՀԱԿՈԲ ՉԱՔՐՅԱՆ
