Բրիտանական «Դեյլի մեյլի» հաղորդմամբ, հայտնի են դարձել այն երեք ամերիկացի դերասանուհիների անունները, որոնք կմարմնավորեն Շերին՝ նրա կյանքի տարբեր հատվածներում «Շեր շոու» մյուզիքլում՝ Մեծ Բրիտանիայում ապրիլից նախատեսվող մեկ տարի տեւող հյուրախաղերի ժամանակ: Դեբի Քարափը, Դենիել Սթերսը եւ Միլի Օ՛Քոնելը 75-ամյա փոփ-դիցուհուն կներկայացնեն երեք տարբեր մարմնավորումներով՝ որպես Աստղ, Լեդի եւ Աղջնակ: Մյուզիքլը հագեցած է Շերի 35 ամենանշանավոր հիթերով: Այն գրել է «Թոնիի» մրցանակակիր Ռիք Էլիսը, բեմադրել է Արլին Ֆիլիպսը:
«Շեր շուուի» առաջնախաղը տեղի է ունեցել Բրոդվեյում, 2018 թվականին եւ արժանացել է երկու «Թոնի» մրցանակի: Այն դրամայի, երգի ու պարի լեզվով ներկայացնում է Շերի փառքի բարձրացման արտասովոր պատմությունը՝ մեծ երազանքներով փոքրիկ աղջնակից եւ բեռնատարի ամերիկահայ վարորդի երկչկոտ դստերից մինչեւ համաշխարհային աստղի գլխապտույտ բարձունքները: Երաժշտախաղը ներկայացնում է նաեւ Շերի կյանքի ազդեցիկ մարդկանց, որոնց թվում են մայրը՝ Ջորջա Հոլթը, առաջին ամուսինը՝ երջանկահիշատակ երգիչ Սանի Բոնոն եւ զգեստների հռչակավոր ձեւավորող Բոբ Մաքին:
Ա. Բ.
