«Սովորել, սովորել, սովորել». ԽՍՀՄ ղեկավար Լենինի կարգախոսը շարունակում է արդիական լինել նաեւ այսօր: Պետք է սովորել անկախ տարիքից, սեռից, ֆինանսական ու ֆիզիկական կարողություններից: Այս կարգախոսը գործի է դրվում նաեւ կրթության առանձնահատուկ պայմանների կարիք ունեցող երեխաների (ԿԱՊԿ) համար:
ՀՀ ԿԳՄՍ նախարարությունը հանրային քննարկման է ներկայացրել հանրակրթական ուսումնական հաստատությունների սովորողների տնային ուսուցման կարգի նախագիծը:
Ըստ նախագծի, ուսումնական հաստատությունների ԿԱՊԿ երեխաների կրթությունը պետք է ապահովվի տնային, հիվանդանոցային, մանկատնային պայմաններում: Հետեւաբար այն երեխաները, որոնք տարբեր առողջական խնդիրների պատճառով որեւէ ժամանակահատվածում կամ երկարատեւ չեն կարողանում հաճախել հաստատություն ուսումնական ծրագիրը կյուրացնեն արտադասարանային պայմաններում: Հաստատությունը ուսման ընթացքում սովորողին անվճար պետք է տրամադրի դպրոցի գրադարանային ֆոնդում առկա դասագրքերը, տանն ապահովի սովորողների ուսումնառության իրականացումը՝ ներառյալ էլեկտրոնային ուսուցման եւ հեռավար ուսուցման տեխնոլոգիաների կիրառումը, իրականացնի սովորողի ուսումնական առաջադիմության ընթացիկ գնահատում, ամփոփիչ ստուգում, ատեստավորում եւ սովորողի փոխադրում հաջորդ դասարան եւ այլն:
Սյուզաննա Մանուկյանն առաջարկում է՝ հանրակրթական ուսումնական հաստատության սովորողների տնային ուսուցման կարգում ավելացնել եւս մեկ ենթակետ, որտեղ կնշվի, թե ինչպես է տնային ուսուցման պայմաններում՝ ուսումնական տվյալ հաստատությունը կազմակերպելու պետական ավարտական քննությունները:
Սովորողների համար տնային ուսուցումը կազմակերպում է այն հաստատությունը, որտեղ հաշվառված է սովորողը, ընդ որում, համաձայն Հայաստանի Հանրապետույան ԿԳՄՍ նախարարի 2020 թվականի մայիսի 20-ի N 09 հրամանի, այն կարող է իրականացվել նաեւ հեռավար ուսուցման ձեւով:
Երեւանի դպրոցներից մեկի տնօրենը մեզ հետ զրույցում նշում է, որ նախագծի օրենքի ուժ ստանալուց անմիջապես հետո կսկսվեն աշխատանքները բոլոր նրանց հետ, ովքեր ունեն ցանկություն, բայց ինչ-ինչ խնդիրների պատճառով բացակայում են դասընթացներից.«Ունենք երեխաներ, որոնք առողջական քրոնիկական խնդիրների պատճառով երկարաժամկետ բացակայում են դասերից, եւ այս նախագիծը արդյունավետ կլինի իրենց համար»,- ասում է նա:
Ի գիտություն ԿԱՊԿ սովորողների ծնողներին՝ տնային ուսուցման իրավունք վերապահող հիվանդությունների ցանկը սահմանում է ՀՀ կառավարությունը: Տնային ուսուցման կազմակերպման համար հիմք են համարվում բժշկական հաստատության տված եզրակացությունը, սովորողի ծնողի (օրինական ներկայացուցչի) գրավոր դիմումը եւ ծնողի ու հաստատության միջեւ կնքված պայմանագիրը: Տնային ուսուցում կազմակերպելու համար պայմանագիրը կնքվում է առավելագույնը երկու տարի ժամկետով, որը կարող է երկարաձգվել միայն հաստատության մանկավարժական խորհրդի որոշման եւ բժշկական եզրակացության հիման վրա:
Այսպիսով, սովորողների տնային ուսուցման կարգը թույլ կտա կարգով առանձնացված դեպքերում սովորողների ուսուցումն իրականացնել տնային պայմաններում՝ անհատական ուսուցմամբ, ինչն էլ կնպաստի նշված սովորողների կրթության իրավունքի իրականացմանը՝ ապահովելով կրթության շարունակականությունը:
ՀԱՍՄԻԿ ՄԽԻԹԱՐՅԱՆ
