«Մսյո Ազնավուրը» հարգանքի տուրք է ֆրանսահայ մեծագույն շանսոնյեին

«Արմինյն Միրոր-Սփեքթեյթր» շաբաթաթերթում Փարիզից Մելանի Թույսուզյանը գրում է, որ մեծագույն հպարտություն պարգեւող կուռք դարձած երգիչ, դերասան, հասարակական գործիչ Շառլ Ազնավուրի ծննդյան հարյուրամյակի առթիվ այս տարվա հոկտեմբերին «Մսյո Ազնավուր» խորագրով մի նոր կենսագրական ֆիլմ է ցուցադրվել ֆրանսիական կինոթատրոններում` ի պատիվ նրա արտակարգ բեղմնավոր կյանքի, որն ավարտվեց 2018-ին:

Մասնավորապես, հոկտեմբերի 23-ին «Պատե-Օպերա» կինոթատրոնի հանդիսատեսները լեփ-լեցուն դահլիճում հուզախառն զգացմունքներով առաջին անգամ լինելով ֆրանսիական էկրանի վրա դիտել են ոչ թե հայոց ցավալի Ցեղասպանության, այլ` ֆրանսիական մշակույթում մեծ դերակատարություն ունեցած հայազգի շանսոնյեի հաղթական երթի մասին մի ֆիլմ, որն ի հակադրություն 2014-ին էկրան բարձրացած «Սպի» ֆիլմի, հեշտությամբ է հաղթահարել օտարների ուշադրությունը գրավելու խնդիրը:

Երկու ֆիլմերի ընդհանրությունը առնչվում է ֆրանսա-ալժիրցի դերասան Թահար Ռահիմի հետ, որ նոր ֆիլմում մարմնավորում է Ազնավուրին 20-50 տարեկան հասակում: Նա երկար եւ բծախնդրորեն է նախապատրաստվել այդ դերի համար: Արխիվային նյութերի ուսումնասիրությամբ եւ ընտանիքի անդամների նկարագրություններով յուրացրել է Ազնավուրի ժեստերը, վոկալի ոճային առանձնահատկությունները եւ բեմական տիպիկ շարժուձեւերը: «Դա խելացնոր գաղափար էր, մտածում էի` չեմ կարողանալու գլուխ հանել, բայց պրոդյուսերները հավատ ներշնչեցին ինձ եւ ուժ տվին առաջ տանելու իմ կարիերայի այս ամենագեղեցիկ փորձառությունը: Ես Շառլի 3 կերպարներն էի մարմնավորելու ֆիլմում` երգեր կատարողին, հասարակական գործչին եւ իրեն անձամբ, որպես անհատականություն: Նպատակս կրկնօրինակելը չէր, այլ` հուզականորեն եւ ճշմարտացի կատարել դերս, որպեսզի «հանդիպեի նրան, ձեռքը սեղմեի եւ առաջ գնայի նրա հետ», խոստովանել է Թահար Ռահիմին:

Ֆիլմում հայերեն լեզվով հնչում են Ազնավուրի հոր խոսքերը. «Նայե, ուր էինք եւ ուր հասանք» դիմադրության շարժման հայտնի առաջնորդներից Միսաք Մանուշյանի դերը կատարում է թատրոնի հայտնի դերասան Տիգրան Մխիթարյանը, որ այդ դերի միջոցով հայտնաբերել է Ազնավուրի «վճռականությունը, տաղանդն ու աշխատասիրությունը»: Ֆիլմի պրոդյուսերն է Ազնավուրի փեսան, Կատիայի ամուսինը` Ժան-Ռաշիդ Կալուշը, որ 2018-ին, Ազնավուրի մահվանից մի քանի ամիս առաջ է ծրագրել այս ֆիլմը նկարահանել: Ֆիլմի ռեժիսորն է Մեհդի Իդիրը: Ֆիլմում հնչում են նրա սիրված երգերից մի քանիսը:

Ազնավուրը այսօր էլ անքակտելի մասն է կազմում ֆրանսիական մշակույթի, նրա «Formidable» երգը հնչեց ռեփ երգիչ Այա Նակամուրայի կատարմամբ 2024 թ. Օլիմպիական խաղերի բացման հանդիսության ժամանակ:

Պատրաստեց` ՀԱԿՈԲ ԾՈՒԼԻԿՅԱՆԸ

«Մսյո Ազնավուր» ֆիլմը դեկտեմբերի 5-ից ցուցադրվում է Երեւանի կինոթատրոններում