2022թ. հունիսի 17-ին Երեւանում տեղի ունեցավ «Ժամանակակից հասարակությունը թվայնացման պայմաններում. ժամանակի մարտահրավերներ» միջազգային գիտագործնական համաժողովը: Այն կազմակերպել էր Ռուսաստանի Գ.Վ. Պլեխանովի անվան տնտեսագիտական համալսարանի Երեւանի մասնաճյուղը եւ նվիրված էր մասնաճյուղի հիմնադրման 20-ամյակին:
Գիտաժողովը բացեց մասնաճյուղի տնօրեն Թամարա Վարդանյանը: Այնուհետեւ առցանց խոսք ասաց Ռուսաստանի տնտեսագիտական համալսարանի պրո-ռեկտոր Վիտալի Մինաշկինը:
Միջոցառմանը ողջույնի խոսքով եւ շնորհավորանքներով հանդես եկան Երեւանի մասնաճյուղի հոգաբարձուների խորհրդի նախագահ Արման Վարդանյանը, հոգաբարձուների խորհրդի անդամ, «Թովմասյան» հիմնադրամի նախագահ՝ Արտակ Թովմասյանը, Երեւանի «Մոսկվայի տուն» միջազգային բիզնես կենտրոնի գլխավոր տնօրեն՝ Վահրամ Կարապետյանը, «Ռուսալ Արմենալ»-ի գլխավոր տնօրեն Արթուր Զաքարյանը, ինչպես նաեւ ՀՀ-ում Ռուսաստանի դեսպանության եւ ՀՀ-ում Ռուսաստանի Դաշնության առեւտրային ներկայացուցչության աշխատակիցներ:
Ռեկտորի անունից մասնաճյուղի գործընկերներն ու աշխատակիցները պարգեւատրվեցին պատվոգրերով:
Այնուհետեւ «Կիրառական ինֆորմատիկա» ոլորտի ուսանողները ներկայացրին դեմքի ճանաչման համակարգով «Խելացի ռոբոտ-օգնական» մշակումը:
Գիտաժողովում Հայաստանի գիտնականներից բացի իրենց մասնակցությունն էին բերել նաեւ Ռուսաստանի, Ուզբեկստանի գիտնականները, որոնք հանդես եկան գիտական զեկուցումներով: Մասնակիցները քննարկեցին կրթության, տնտեսագիտության եւ տեխնոլոգիային առնչվող մի շարք հարցեր:
Ստեփան ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
