Եթե գրենք, թե հանրապետականները լիովին աջակցում են Դոնալդ Թրամփին, թերի կլինի այս պարագայում: Սատարման, սիրո կամ միգուցե քծնանքի աստիճանն այնքան անսովոր է. Պատգամավորներից Կլաուդիա Թեննին (Claudia Tenney) օրինագիծ է ներկայացրել՝ առաջարկելով Թրամփի տարեդարձի օրը՝ հունիսի 14-ը տոն դարձնել, այն հանգստյան՝ ոչ աշխատանքային սահմանելով: ԱՄՆ նախագահներից այդպիսի պատվի արժանացել է միայն Ջորջ Վաշինգթոնը: 1879 թվականից փետրվարի 22-ը ԱՄՆ-ում պաշտոնապես տոնական օր է սահմանվել, իսկ 1970-ից ընդլայնել է նշանակությունը: Վաղը՝ փետրվարի 22-ին, ԱՄՆ-ում տոնում են «President՛s Day» («Նախագահի օրը»), որով մեծարում են բոլոր նախագահներին:
Հունիսի 14-ին ծնված Թրամփն իր տարեդարձի հետ մեկտեղում է նաեւ բոլոր ամերիկացիների համար տոնական «Flag Day»ը («Դրոշի օրը»), որ որոշ նահանգներում ոչաշխատանքային է: Հանրապետական Թեննին իր առաջարկն այսպես է հիմնավորում. «Արդի ժամանակներում ԱՄՆ եւ ոչ մի նախագահ Թրամփի նման կենտրոնում չի դրել Միացյալ Նահանգները»: Որպես «ոսկեդարի հիմնադիր»՝ նախագահ Թրամփն արժանի է նույնքան մեծարման, որքան Վաշինգթոնը: Թեննիի X հարթակն ուսումնասիրելիս, ինձ համար մի կերպար է հառնում՝ Ստալինը:
Իհարկե կան երկրներ, որ իրենց պետության ղեկավարի ծննդյան օրը որպես պետական տոն են նշում: Միապետություններում՝ Մեծ Բրիտանիայում, Թայլանդում, Նիդեռլանդերում եւ Հյուսիսային Կորեայի նման բռնապետությունում դրա օրինակը կա: Իսկ ԱՄՆ-ում անցյալ տարվանից է նկատելի՝ աճում է Թրամփի հանդեպ սերը, որ վերածվում է անձի պաշտամունքի: Տեսնես քանի՞ երկիր կվարակվի այս վիրուսով:
ԱՆԱՀԻՏ ՀՈՎՍԵՓՅԱՆ
Գերմանիա
