Իտալիայի Մարկե մարզի Անկոնա գավառի Սենիգալիա քաղաքում գործող «Անջելիկա Կատալանի» ընկերակցությունը մարզի եւ Սենիգալիայի կոմունայի հովանավորությամբ անցյալ տարվանից կազմակերպում է դասախոսությունների շարք՝ «Aliquid historia dignum. Incontri con la storia» («Արժանի իմանալու. Հանդիպումներ պատմության հետ») ընդհանուր վերնագրով: Դրանք տեղի են ունենում քաղաքի կենտրոնում գտնվող Սան Ռոկկա դահլիճում: Բանախոսությունների կազմակերպմանը գործուն մասնակցություն է ունենում Սենիգալիայում բնակվող երիտասարդ պատմաբան Նիկոլա Մարիա Կամերլենգոն:
Այս տարի օգոստոսի 24-ին կայացած երկրորդ բանախոսության համար հատուկ հրավիրվել էր ՀՀ Գիտությունների ազգային ակադեմիայի պատմության ինստիտուտի ավագ գիտաշխատող Արծվի Բախչինյանը: Վերջինս հանդես եկավ «Հայոց արտագաղթը դարերի ընթացքում» թեմայով զեկուցմամբ, որն ընդգրկում էր հայոց գաղթավայրերի եւ հայ սփյուռքի հակիրճ պատմությունը, դիտարկումներ հայ տարագրության ինքնության եւ հայ Սփյուռքի ապագայի վերաբերյալ:
Զեկուցումն ընթերցվեց անգլերեն, որն ընդմիջարկվում էր Նիկոլա Մարիա Կամերլենգոյի իտալերեն թարգմանությամբ, բանախոսության ընթացքում ցուցադրվում էին լուսանկարներ եւ քարտեզներ: Երկւո ժամ տեւած երեկոյի վերջում բանախոսը պատասխանեց ներկաների հարցերին:
Ա. Բ.
