Հայոց պետության արարողակարգն արդեն Թուրքիա՞ն է կառավարում

724

ՄԱԿ-ի գլխավոր ասամբլեայի նախագահ Աբդուլա Շահիդի՝ հուլիսի 27-ին Ծիծեռնակաբերդ այցը հաջորդ օրն իսկ արժանացել է Թուրքիայի ԱԳՆ դատապարտմանը, որը հետեւանք է ունեցել։ Շահիդը հեռացրել է Հայոց ցեղասպանության հուշահամալիր իր այցը լուսաբանող թվիթերյան գրառումը։ Փաստորեն Հայոց ցեղասպանության զոհերի հուշահամալիրում անմար կրակի առջեւ խոնարհվելուց հետո, հաջորդ օրը Շահիդը խոնարհվել է Թուրքիայի պահանջի առջեւ։ Մինչեւ հիմա բարոյական փոխհատուցման մասին խոսք չի հնչել Հայաստան պետության որեւէ ներկայացուցչից, թեեւ Շահիդը երեկ շարունակում էր հանդիպումները նրանց հետ եւ անշուշտ կարող էր պատկերացնել, որ սա պատմական արդարության կարոտ ժողովրդի ցասմանը կարժանանա։ ՀՀ ԱԳ նախարար Արարատ Միրզոյանի հետ երեկ կայացած հանդիպմանը հաջորդած ասուլիսին, ինչպես փոխանցում է «Ազատությունը», անպատասխան է մնացել Շահիդին ուղղված լրագրողի հարցը։ «Ինչո՞ւ է  դիվանագետը հեռացրել գրառումը, արդյոք պաշտոնական Անկարայի կոշտ արձագա՞նքն է եղել պատճառը», հուլիսի 28-ին ԱԳՆ-ում հյուրընկալվող Աբդուլլա Շահիդն «Ազատությանը» որևէ մեկնաբանություն չտվեց։

Եվ՝ վե՞րջ։ Ուրիշ ի՞նչ պատճառ կարող է լինել։ Օրեր առաջ «Գորշ գայլերի» անդամներից մեկն էր Ծիծեռնակաբերդում անարգել մեր արժանապատվությունը, երեկ՝ ՄԱԿ-ի պաշտոնյան։ Նո՞ւյն արժեքներն են դավանում նրանք։ Իսկ մեր պաշտոնյանե՞րը։

ԱՆԱՀԻՏ ՀՈՎՍԵՓՅԱՆ

Գերմանիա