Թուրքից ի՞նչ կարելի է սպասել, ասես գաղտնիք է՝ ով է թուրքը կամ ինչ նպատակներ ունի, ամբողջ խնդիր դրա մեջ է. Արցախի Փառուխ գյուղի տարածքում ադրբեջանական զինուժի առաջխաղացման ու Քարագլխի բարձունքի ուղղությամբ դիրքավորվելու մասին խոսելուց առաջ «Վան» գործողության հրամանատար, ԱՍԱԼԱ-ի մարտիկ Վազգեն Սիսլյանը նախեւառաջ հիշեցնում է թուրքի՝ ով լինելու մասին: Զարմանում է՝ իշխանություններն այսօր համոզում են թուրքի հետ բարեկամություն անել, ասում, թե լավն են: «Խաղաղություն բոլորն են ուզում, բայց ոչ միայն մեր վճարելու գնով: Այսօր, առավել քան երբեւէ, սահմանները պաշտպանելու խնդիր կա»,- «Ազգ»ի հետ զրույցում ասում է նա:
Ստեղծված իրավիճակի վերաբերյալ ԱՍԱԼԱ-ի մարտիկը միանշանակ կարծիք ունի՝ կա մեկ մեղավոր, ու դա ո՛չ Ադրբեջանն է, ո՛չ Արցախում խաղաղարար առաքելություն իրականացնող ռուս խաղաղապահ զորախումբը, թե՛ պատասխանատուն, թե՛ մեղավորը Հայաստանի գործող իշխանություններն են: Ոչ միայն Արցախի, այլ նաեւ Հայաստանի ինքնիշխան տարածքների մի մասը կորցնելու վտանգն է մտահոգում Վազգեն Սիսլյանին: Շեշտում է՝ առաջինը ազատամարտիկն ու զենք կրող մարդն է խաղաղություն ուզում, բայց քանի որ Արցախյան հարցը խաղաղությամբ չի լուծվի, հետեւաբար, պետք է ազգովին բանակ դառնանք՝ ներգրավելով նաեւ ամբողջ սփյուռքին:
«Ինչքան թուլանում ենք, ինչքան մեր դիրքերը սասանվում են, այնքան ադրբեջանցին հաբռգում է, երես է առնում՝ փորձելով առաջ գալ: Ամբողջ Թուրքիան հենց այդ՝ կամաց-կամաց առաջ գալու ու տիրանալու ռազմավարությամբ է պետություն դարձել: Այժմ էլ խաղաղության անվան տակ, քայլ առ քայլ, գյուղ առ գյուղ հայաթափելով, պանթուրքիստական իր վաղեմի ծրագիրն է կյանքի կոչում: Այժմ այնպիսի խաղաղության մասին է խոսվում, որով թուրքն ուզում է ուտել մեզ: Նման խաղաղություն ես չեմ ուզում»,- ամփոփում է մեր զրուցակիցը:
ՍԵՎԱԿ ՎԱՐԴՈՒՄՅԱՆ
