Հոկտեմբերի 7-ին Բրյուսելում 82 տարեկան հասակում վախճանվել է տավղահարուհի եւ երաժշտական մանկավարժ Սյուզաննա Միլդոնյանը (Շուշանիկ Միլտոնյան): Նա ծնվել էր Վենետիկում: 1959 թվականին ավարտել է Վենետիկի կոնսերվատորիան (Մարգարիտա Չիկոնյարիի դասարան), հետագայում դարձել նույն կոնսերվատորիայի պրոֆեսոր: Համերգներով հանդես է եկել 13 տարեկանից, շրջագայել աշխարհի շատ երկրներում, Հայաստանում՝ 1968 թվականին: 1959 թվականին Թել Ավիվում տավղահարների միջազգային մրցույթի, 1962 թվականին՝ Փարիզի ազգային կոնսերվատորիայի, 1964 թվականին՝ Շվեյցարիայի, 1971 թվականին Մարսել Տուրնիեի անվան եւ տասնյակ այլ միջազգային մրցույթների դափնեկիր էր: Սյուզաննա Միլդոնյանը Փարիզում արժանացել է նաեւ Ձայնապնակների մեծ մրցանակին: 1960 թվականից բնակվել է Փարիզում, ուսանել տեղի կոնսերվատորիայում Պիեռ Ժամեի մոտ, ապա դարձել է Բրյուսելի սիմֆոնիկ նվագախմբի մենակատարը: Հանդես է եկել եվրոպական նշանավոր նվագախմբերի հետ: Համերգային հայտագիրն ընդգրկել է հնագույն երաժշտությունից մինչեւ նորագույնը: Տավղի համար փոխադրել է Մատեո Ալբենիսի ռե մինոր կլավիրի սոնատը: Կատարել է նաեւ Կոմիտասի ստեղծագործություններից: Դասավանդել է Բրյուսելի թագավորական կոնսերվատորիայում եւ Սիենայի (Իտալիա) Կիջի ակադեմիայում: Նիդեռլանդների թագուհի Յուլիանան եւ արքայադուստր Մարգրիտն ընդունել են Սյուզաննա Միլդոնյանին դստեր՝ Ալիսայի հետ միասին:
Սյուզաննա Միլդոնյանը խոնարհ ու խոհեմ կին էր, առատաձեռն, բարեսիրտ, ջերմ, իր սաների հետ մտերիմ, ոգով ու հումորով լեցուն: Նա եղել է ոգեշնչման եւ մոտիվացիայի աղբյուր բազմաթիվ տավղահարների համար:
Ա. Բ.
