Այս օրերին հարեւան Իրանում նշում են նոուռուզը, որը առիթ է դարձել հայ համայնքային գործիչների համար ամփոփելու նախորդ տարում սոցիալ-տնտեսական դժվարին պայմաններում կատարված աշխատանքներն ու բացթողումները:
Իսլամական խորհրդարանում Թեհրանի եւ հյուսիսային իրանահայության պատգամավոր Արա Շահվերդյանն ամփոփելով իրանական 1401 թվականը՝ առանձնացնում է խորհրդարանական եւ պետական մակարդակում իրանահայության երկու կարեւոր ձեռքբերում: Առաջինը կրոնական փոքրամասնություններին եւս հնարավոր դարձավ զբաղեցնել գերզգայուն պաշտոններ, որի վերաբերյալ նախապես տեղեկացրել ենք մեր ընթերցողներին: Իսկ երկրորդն առնչվում է Քաղաքացիական օրենսգրքի 881-րդ հոդվածին, ըստ որի, ժառանգության բաժանումը հաշվարկվում եւ կատարվում է քաղաքացու նախկին դավանանքի օրենքի համաձայն: Այսինքն՝ կրոնափոխության դեպքում ժառանգությունը չի կարող փոփոխության ենթարկվել:
Կարծում ենք, որ իրավական տեսանկյունից նշված օրենքները կարեւոր են, սակայն կարիք են զգում լրամշակման, քանի որ առաջինի դեպքում չեն կարող օգտվել, օրինակ, երկքաղաքացիություն ունեցող այն իրանահայերը, որոնք ունեն միաժամանակ ՀՀ քաղաքացիություն: Այդպիսով, նրանք չեն կարող ԻԻՀ-ում զբաղեցնել պաշտոններ:
Մյուս կողմից հակառակ նշված որոշ ձեռքբերումների, համայնքում շարունակում են մնալ խնդրահարույց կարիքավոր ընտանիքներին օժանդակության, ուսանողներին աջակցության, դպրոցների եւ կրթական ոլորտի բարելավման հարցերը:
Համայնքում օրակարգային է դարձել նաեւ համայնքի որոշ դպրոցների օպտիմալացման հարցը, որը ստեղծվել է շարունակական արտագաղթի հետեւանքով: Այդ պայմաններում արդիական է համարվում տեղեկատվական տեխնոլոգիաներով նորարար կենտրոնների ձեւավորման ծրագիրը, որը աշակերտներին հնարավորություն կտա զարգացնել ստեղծագործական ունակությունները: Սակայն այս դեպքում էլ կարծում ենք անհրաժեշտ են ավելի շատ ֆինանսական ներդրումներ:
Հարկ է նշել, որ վերանորոգվել է «Թովմասեան» դպրոցի սրահը, «Մարի Մանուկեան» դպրոցի լաբորատորիան, չորս մանկապարտեզի բակերը, համալրվել են «Թունեան-Թովմասեան» եւ «Սողոմոնեան» դպրոցները նոր համակարգիչներով: Հատկանշական է, որ Իսլամական խորհրդարանից այս տարի ստացվել է փոքրամասնություններին տրամադրված ֆինանսական հատկացումը, որը կարող է օգտակար լինել որոշ հարցերի լուծման համար:
Այսպիսով, իրանական 1401 թվականն ավարտվում է հայ համայնքի համար սոցիալ-իրավական որոշ խնդիրների լուծմամբ, ինչպես նաեւ բազմաթիվ այլ հարցեր հետագայում լուծելու սպասումով: Ակնհայտ է, որ մի շարք խնդիրներ էլ առաջացել են արտագաղթի հետեւանքով, որն էլ նոր իրավիճակ է պայմանավորում գերազանցապես մայրաքաղաքային հայկական այս համայնքում:
ԿԱՐԵՆ ՄԿՐՏՉՅԱՆ
