Իսրայելը գաղտնի օգնել է Լեռնային Ղարաբաղի նկատմամբ վերահսկողություն հաստատելու Ադրբեջանի արշավին՝ սեպտեմբերյան հարձակումից առաջ հզոր զենք մատակարարելով նրան: Այս մասին հայտնում է «Ասոշիեյթիդ պրես» միջազգային լրատվական գործակալությունը, հղում անելով փորձագետներին եւ հայաստանյան պաշտոնյաներին: Գործակալության hոկտեմբերի 5-ի համապատասխան հրապարակումը ներկայացրել է ռուսական «Ռամբլեր»-ը:
Ըստ թռիչքների հետագծման տվյալների, Ադրբեջանի կողմից ռազմական գործողությունները սկսելուց ընդամենը շաբաթներ առաջ ադրբեջանական ռազմական բեռնատար ինքնաթիռները բազմիցս թռիչքներ են կատարել Իսրայելի հարավային ավիաբազայի եւ Լեռնային Ղարաբաղի մերձակայքում գտնվող օդանավակայանի միջեւ, ասվում է հաղորդագրությունում: Ի դեպ, այս կարգի թռիչքների մասին նախկինում ահազանգել են նաեւ հայաստանյան լրատվամիջոցները, «Ազգ»ը ներառյալ:
Այդ թռիչքներն անհանգստացրել են Երեւանին, որը վաղուց զգուշանում է Իսրայելի եւ Ադրբեջանի միջեւ ռազմավարական դաշինքից, ինչպես նաեւ «լույս են սփռել Իսրայելի ազգային շահերի վրա Կովկասյան լեռներից հարավ գտնվող անհանգիստ տարածաշրջանում», նշել է «Ասոշիեյթիդ պրես»-ը:
«Մեզ համար լուրջ խնդիր է, որ իսրայելական զենքը կրակում է մեր ժողովրդի վրա»,- գործակալությանն ասել է Իսրայելում Հայաստանի դեսպան Արման Հակոբյանը: Դիվանագետը պատմել է, որ վերջին շաբաթներին ինքը մտահոգություն է հայտնել իսրայելցի քաղաքական գործիչներին ու օրենսդիրներին Ադրբեջանին զենքի մատակարարումների վերաբերյալ: «Ես չեմ հասկանում, թե ինչու Իսրայելը չի կարող գոնե որոշակի մտահոգություն հայտնել իրենց հայրենիքից վտարված մարդկանց ճակատագրի համար»,- ասել է Հակոբյանը:
Փորձագետները, որոնց հետ զրուցել է գործակալությունը, կարծում են, որ սեպտեմբերին Ադրբեջանի կողմից օգտագործված ծանր հրետանին, հրթիռային կայանքներն ու անօդաչու սարքերը հիմնականում տրամադրվել են Իսրայելի եւ Թուրքիայի կողմից: Իսրայելի ԱԳՆ-ն եւ պաշտպանության նախարարությունը հրաժարվել են մեկնաբանել այս պնդումները:
Գործակալությունը նշում է, որ Իսրայելը մեծ խաղադրույք է կատարում Ադրբեջանի վրա, որը նավթի կարեւորագույն աղբյուր է եւ «հավատարիմ դաշնակիցը Իսրայելի երդվյալ թշնամու՝ Իրանի դեմ պայքարում»: Բաքուն նաեւ ժամանակակից զենքի շահութաբեր գնորդ է: Ըստ «Ասոշիեյթիդ պրես»-ի, Ադրբեջանն ապահովում է Իսրայելի նավթի կարիքների առնվազն 40 տոկոսը: Փորձագետների գնահատմամբ, 2016-2020 թվականներին Իսրայելի մատակարարումները ապահովել են Ադրբեջանի զինանոցի գրեթե 70 տոկոսը, ինչը Բաքվին առավելություն է տվել Երեւանի նկատմամբ եւ խթանել Իսրայելի խոշոր պաշտպանական արդյունաբերությունը:
ԳԵՂԱՄ ՄԿՐՏՉՅԱՆ
