«Al-Monitor»-ի թղթակիցներ Էզգի Ակընն ու Ջարեդ Ժուբան արձագանքելով պետական «Anadolu» լրատվական գործակալության հաղորդմանը, որ մարտի 6-ին Թուրքիայի ԱԳՆ-ն Մ. Նահանգների դեսպան Ջեֆ Ֆլեյկին իր մոտ է կանչել բացատրություններ լսելու, թե ինչու անցյալ շաբաթավերջին ԱՄՆ բարձրաստիճան գնդապետ Մարկ Միլեյը անակնկալ կարգադրությամբ Սիրիայի քրդական վերահսկողության տակ գտնվող շրջանի ամերիկյան գաղտնի ռազմակայանն է այցելել, գրում են, որ ԱՄՆ պետքարտուղարության մամուլի խոսնակ Նեդ Փրայսը հաստատել է Ֆլեյկի այցը Թուրքիայի ԱԳՆ, ասելով. «Որքան մեզ հայտնի է, գնդապետ Միլեյը Սիրիայում հանդիպել է միայն ամերիկացի զորամիավորումների ներկայացուցիչների հետ: Պենտագոնի խոսնակ գնդապետ Դեյվ Բաթլերն էլ ավելացրել է, որ Միլեյը, որ միացյալ աշխատակազմերի խմբի ղեկավարն է, հանդիպել է Սիրիայում եւ Իրաքում ամերիկյան զորքերի գլխավոր հրամանատար Մաթյու ՄկՖարլեյնի հետ՝ տեղեկանալու, թե արդյոք անհրաժեշտության դեպքում պատրաստ կլինե՞ն ձեռնարկել անվտանգության պատշաճ միջոցներ: Նա չի հանդիպել Սիրիայի դեմոկրատական ուժերի` SDF-ի ներկայացուցիչների հետ: Գնդապետի այցը ըստ երեւույթին եղել է ի պատասխան նախագահ Բայդենի վարչակազմի կարգադրության, որ մտադիր է պահպանել քրդական ղեկավարության տակ գործող SDF-ին զորակցող ամերիկացի զինվորների ներկայությունը Սիրիայում, որպեսզի հնարավոր լինի ճնշում գործադրել Իսլամական Պետություն խմբավորման մնացորդացի վրա, որը փորձում է վերակազմավորվել: Վաշինգտոնը ցանկանում է պահպանել այդ տարածաշրջանի անվտանգությունը, սակայն Միլեյի այցը ԱՄՆ-ի նկատմամբ մեղադրանքների նոր ալիք է առաջացրել Թուրքիայում նախընտրական շրջանի այս թեժ օրերին:
Անկարան SDF-ին աջակցող «Սիրիայի ժողովրդի պաշտպանության միավորումը»` YPG-ին, որի կազմում են հիմնականում քուրդ ոստիկանններ, համարում է PKK-ի անբաժան մասնիկը, իսկ Քուրդիստանի բանվորական կուսակցությունը` PKK-ն, ահաբեկչական կազմակերպություն:
Մ. Նահանգները, սակայն, YPG-ն ահաբեկչական խմբավորում չի համարում եւ Սիրիայում զինել ու մարզել է դրա անդամներին 2015-ից սկսած, որպեսզի ԻՊ-ի դեմ կռվելու պատրաստ լինեն: Ձեռք բերված արդյունքները հաջողված են բնորոշվում, սակայն կատարվածը ամենափշոտ հարցն է մնում ՆԱՏՕ-ի անդամ երկու դաշնակիցների` Մ. Նահանգների եւ Թուրքիայի միջեւ: SDF-ը Թուրքիային չի սպառնում եւ նշել է բազմիցս, որ պատրաստ է բանակցել թուրքական կառավարության հետ: Անկարան քանիցս կոչ է արել Մ. Նահանգներին վերջ դնել Սիրիայի քրդերին աջակցելու քաղաքականությանը եւ դուրս բերել իր զորքերը Սիրիայից, որպեսզի հնարավոր լինի մերձեցման ուղիներ գտնել նախագահ Բաշար Ասադի հետ հանդիպելու:
Մ. Նահանգները զգուշավոր է եւ փորձում է խոչընդոտել թուրքական որեւէ նոր ռազմական միջամտություն YPG-ի դեմ, ինչը կթուլացներ ԻՊ-ի դեմ գործադրված պայքարը: Հյուսիս-արեւելյան Սիրիայում մոտ 10 հազար ԻՊ-ի մարտիկներ բանտարկված են հատուկ շենքային հարմարություններում, որոնք գտնվում են SDF-ի խստագույն վերահսկողության ներքո: Էրդողանը, ճիշտ է, վերջին ամիսներին նվազեցրել է նոր հարձակումների իր սպառնալիքները՝ Մ. Նահանգների եւ Ռուսաստանի ճնշումների ներքո, սակայն անցյալ նոյեմբերին թուրքական ԱԹՍ-երի եւ օդային այլ բլից հարձակումները, որոնք ամերիկյան զորամիավորումների կենտրոնին շատ մոտիկ էին ավերածություններ գործել եւ պատճառ էին դարձել, որ ԿՀՎ-ի պետը զգուշացներ Անկարայի իր գործընկերոջը: Այլ անհամաձայնություններ եւս խաթարել էին ԱՄՆ-Թուրքիա հարաբերությունները, որոնք մի փոքր բարելավվեցին ուկրաինական հացահատիկի արտահանման շուրջ Ռուսաստանի հետ Թուրքիայի ձեռք բերած համաձայնության եւ ավերիչ երկրաշարժի առթիվ Անկարային ցուցաբերված Մ. Նահանգների մարդասիրական օժանդակության շնորհիվ:
Պատրաստեց ՀԱԿՈԲ ԾՈՒԼԻԿՅԱՆԸ(The Armenian Mirror-Spectator)
