Ընդդիմադիրները շարժման առաջնորդի հարցն են քննարկում, թեկնածուներն առայժմ երկուսն են

350

«Դիմադրության շարժման» անդամներն այս օրերին ակտիվ քննարկումների մեջ են, ուզում են հասկանալ՝ ինչպե՞ս անեն, որ մարդիկ հանկարծ չհիասթափվեն, ու շարժումը չմարի: «Ազգ»ի տեղեկություններով՝ շարժման լիդերները՝ «Հայրենիք» կուսակցության  ու խորհրդարանական «Պատիվ ունեմ» խմբակցության առաջնորդ Արթուր Վանեցյանը, ՀՅԴ Գերագույն մարմնի ներկայացուցիչ, ԱԺ փոխնախագահ Իշխան Սաղաթելյանն ու ՀՅԴ-ի վերին էշելոնի այլ ներկայացուցիչներ, ինչպես նաեւ՝ Ռոբերտ Քոչարյանի աջակիցներից ոմանք հաշվարկներ են անում, թեժ բանավեճեր ունենում, թե ի վերջո ով պետք է գլխավորի շարժումը, կամ, առհասարակ, Ֆրանսիայի  հրապարակ եկող քաղաքացիներին առաջնորդ, ասել է թե՝ վարչապետի թեկնածու պե՞տք է, թե՞ ոչ: Մեր տեղեկություններով՝ բացի դաշնակցականներից, մյուսներն ասես կոնսեսուսի են եկել որպես շարժման առաջնորդ՝ Հայաստանի նախկին օմբուդսմեն Արման Թաթոյանին նշանակելու հարցում: «Դաշնակցականներն այն համոզմանն են, որ իրենք են շարժման շարժիչ ուժն, իրենք են բոլոր ակցիաների ու գործողությւոնների կիզակետում, հետարաբար իրենք էլ պետք է առաջնորդեն շարժումը»,- ասաց մեր զրուցակիցը:

Նկատենք, որ Արման Թաթոյանը, անդրադառնալով իր՝ քաղաքական ակտիվ գործունեություն ծավալելու ու որպես շարժման առաջնորդ հանդես գալու հայտարարություններին, նշել էր. «Երբ անհրաժեշտ համարեմ ներգրավվել որեւէ քաղաքական գործընթացի մեջ, ապա կգործեմ ինքնուրույնաբար ու դրա մասին կհայտարարեմ հստակ: Ընդ որում, կառաջնորդվեմ պետության անվտանգության, իրավունքի գերակայության ու մարդու իրավունքների երաշխավորման, ազգային արժեքների պաշտպանության, հանրային համերաշխության վերականգնման օրակարգով»:

 Հայտարարությունը բնավ չի հերքում, թե ինչ-որ ժամանակից սկսած Թաթոյանը կարող է քաղաքականությամբ զբաղվել «Դիմադդրության» կամ այլ շարժման շրջանակներում:

«Ազգ»ի տեղեկություններով, բացի Թաթոյանից, ընդդիմադիրները քննարկում են նաեւ ՀՀ նախկին վարչապետ Կարեն Կարապետյանի թեկնածության հարցը: Վերջինս սակայն որեւէ կերպ համաձայն չէ նորից կամ կրկին պաշտոն զբաղեցնել Հայաստանում:

Ի դեպ, «Ազգ»ի նախորդ համարում «Երեւանում մթնոլորտը հեղափոխական չէ, օդում լարում չկա» վերտառությամբ լուրը բավական բուռն «լարումներ» է առաջացրել ընդդիմադիր գործիչների ներսում: Մեզ հետ մասնավոր ու առանձին զրույցներում նշում են, որ համաձայն են մեր հատկապես այն դիտարկման հետ, որ քաղաքացիները փողոց դուրս չեն գալիս նաեւ այն պատճառով, որ չեն ցանկանում տեսնել ոչ այդքան ընկալելի, կոռուպցիոն սկանդալների մեջ թաթախված կամ օդիոզ դեմքերի:

ՍԵՎԱԿ ՎԱՐԴՈՒՄՅԱՆ