Սեպտեմբերի 5-ին Իրկուտսկում մեկնարկել է նշանավոր դաշնակահար Դենիս Մացուեւի «Աստղերը Բայկալում» փառատոնը, որին մասնակցում են ավելի քան 400 երաժիշտներ, այդ թվում՝ Առաջին միջազգային երաժշտական մրցույթի հաղթողներ: Սեպտեմբերի 13-ին Իրկուտսկի մարզային ֆիլհարմոնիայի բեմում մենակատարումներով հանդես են եկել հայազգի երիտասարդ դաշնակահարներ Եվա Գեւորգյանը եւ Իլյա Պապոյանը: Առաջինի ծրագրում ընդգրկված է եղել Ռախմանինովի, երկրորդի երկացանկում՝ Լիստի ստեղծագործություններից:
Եվա Գեւորգյանը (ծնված Մոսկվայում, 2004-ին) հայաստանցի հոր (Բաբկեն Գեւորգյան) եւ ռուս մոր դուստր է: Նվագում է երեք տարեկանից: Ուսանել է Մոսկվայի Չայկովսկու անվան պետական կոնսերվատորիային կից երաժշտական դպրոցում: Մասնակցել է 15-ից ավելի միջազգային մրցույթների եւ փառատոների (ԱՄՆ, Լեհաստան, Իտալիա, Ռուսաստան, Գերմանիա)՝ արժանանալով բացառապես առաջին մրցանակների: 2020-ին Եվա Գեւորգյանը Գրան պրի է ստացել Չիկագոյի միջազգային երաժշտական մրցույթում, նաեւ հատուկ մրցանակ՝ Ֆ. Շոպենի ստեղծագործության լավագույն կատարման համար: 2019-ին ստացել է Հայաստանի քաղաքացիություն, այսուհետ միջազգային մրցույթներում ներկայացնում է Հայաստանը:
Իլյա Պապոյանը (ծնված Սանկտ Պետերբուրգում, 2001-ին) ինը տարեկանում դարձել է Շոպենի անվան միջազգային երիտասարդական մրցույթի դափնեկիր (Պետերբուրգ), 13 տարեկանում առաջին մենահամերգն ունեցել Պետերբուրգի պետական ակադեմիական Կապելլայի բեմում: Ավարտել է Պետերբուրգի Ռիմսկի-Կորսակովի անվան Պետերբուրգի պետական կոնսերվատորիայի միջնակարգ հատուկ երաժշտական դպրոցը, ապա՝ կոնսերվատորիան: Մի շարք համառուսաստանյան եւ միջազգային մրցույթների դափնեկիր է: Մասնակցել է Դիեւի, Գրուզմանի, Ներսեսյանի, Մնդոյանցի վարպետության դասերին: Այս տարի Մոսկվայի Ռախմանինովի անվան մրցույթում արժանացել է երրորդ մրցանակի:
Ա. Բ.
