ԵՊՀ Տնտեսագիտության եւ կառավարման ֆակուլտետի Կառավարման եւ գործարարության ամբիոնի վարիչ Կառլեն Խաչատրյանի գնահատմամբ՝ Ռուսաստանի Դաշնության՝ գազի դիմաց ռուբլով վճարելու պահանջն ստեղծված իրավիճակում տրամաբանական է, քանի որ Արեւմուտք-Ռուսաստան առճակատման ֆոնին կողմերից յուրաքանչյուրը փորձում է հնարավորինս մեծ անհարմարություններ ստեղծել դիմացինի նկատմամբ: Արեւմուտքի աննախադեպ մասշտաբի պատժամիջոցների ֆոնին ռուսական տնտեսությունը մարտահրավերների առջեւ է կանգնած, էապես թուլացել է ռուսական ռուբլու դիրքերը, ուստի ռուսական կողմը պետք է փորձեր համարժեք հակազդեցություն ցուցաբերել: «Եվրոպացիներին գազի դիմաց ռուսական ռուբլով վճարելու պահանջը թերեւս լավագույն որոշումն էր, որ կարող էր Ռուսաստանի Դաշնությունը կայացնել»,- «Ազգ»ի հետ զրույցում ասում է տնտեսագետը:
Ըստ նրա՝ ինքնին հասկանալի է Արեւմուտքի արձագանքն այս առաջարկին, քանի որ եթե եվրոպացիները համաձայնեն վճարել ռուբլիով, դա ուղղակի նշանակում է գործարքի գնալ Ռուսաստանի կենտրոնական բանկի հետ, որն, ի դեպ, պատժամիջոցների տակ է:
«Բացի այդ, հասկանալի է նաեւ, որ գազի դիմաց ռուբլիով վճարելու պարագայում ռուբլին կսկսի վերականգնել իր դիրքերը, եւ արդեն իսկ, միայն այս հայտարարությունների ֆոնին ռուբլու փոխարժեքը որոշակի չափով ամրապնդվեց: Արեւմուտքը գիտակցում է, որ ռուսական կողմի պահանջի բավարարումը կնշանակի անուղղակի կերպով նպաստել պատժամիջոցների տնտեսական հետեւանքների չեզոքացմանը եւ ռուսական տնտեսության վերականգնման հնարավորություններ ընձեռելուն, ուստի կտրականապես մերժում է եւ բացառում նման հնարավորությունը»,- նշում է մեր զրուցակիցն ու ավելացնում, որ գոնե հայտարարությունների մակարդակով պարզ է՝ կողմերը չեն պատրաստվում զիջել:
Մյուս կողմից էլ, շարունակում է, խնդիրը որեւէ հանգուցալուծում պետք է ստանա: Եվրոպական երկրները, փաստացի, էապես կախված են ռուսական գազից ու չեն կարող հեշտությամբ հրաժարվել դրանից: Ռուսաստանն ապահովում է Եվրոպա մատակարարվող գազի շուրջ 40 %-ը, մյուս կողմից՝ Ռուսաստանի համար կարեւոր են Եվրոպա մատակարարվող գազի դիմաց ստացվող գումարները:
«Մոտավոր հաշվարկներով՝ Եվրոպան օրական 400-800 մլն դոլարի ռուսական գազ է սպառում, ուստի ռուսական կողմը չի կարող հեշտությամբ որոշել, որ եթե Արեւմուտքն իր պահանջը չկատարի, ապա կդադարեցնի գազամատակարարումը: Ամեն դեպքում, իմ կարծիքով, միտումները ցույց են տալիս, որ Եվրոպան համեմատաբար ավելի թույլ դիրքում է գտնվում եւ ռուսական գազի չմատակարարման պարագայում անասելի խնդիրների առջեւ կարող է կանգնել: Հաշվարկներ կան, որ եթե գազամատակարարումն ավելի քան 2 ամսով դադարեցվի, ապա հաջորդ ձմռանը Եվրոպան հումանիտար աղետի առաջ կարող է կանգնել՝ գազի պահեստարանները կիսադատարկ լինելու պատճառով»,- մեկնաբանում է Խաչատրյանը:
Խմբագրության կողմից.- Ավելացնենք, որ չորեքշաբթի օրը Ռուսաստանի նախագահը հայտարարեց, որ պատրաստ է վերատեսության ենթարկելու «Գազ՝ ռուբլու դիմաց» առաջարկությունը, թերեւս հաշվի առնելով եվրոպական մեծ երկրների կտրական ոչ-ը իր առաջարկին, թերեւս էլ՝ հաշվի առնելով սեփական երկրի կորուստների վիթխարի լինելը:
ՍԵՎԱԿ ՎԱՐԴՈՒՄՅԱՆ
