Շրջափակված Արցախում ներքաղաքական լարումը հասել է գագաթնակետին: «Ռինգ» դուրս եկած քաղաքական ուժերը միմյանց կծոտում են թե՛ հրապարակային տեքստերով, թե՛ տողատակերով: Հիմնական հակասությունը նախագահ Արայիկ Հարությունյանի ու նախկին պետական նախարար Ռուբեն Վարդանյանի միջեւ է: Անհասկանալի չեզոքություն է պահպանում մոտ երկու ամիս առաջ նախագահի հրաժարականը պահանջող ու նրան վերջանգիր ներկայացող գեներալ Սամվել Բաբայանը: «Ազգ»-ի արցախյան աղբյուրները հայտնում են, որ շրջափակման պայմաններում, երբ քաղաքականությունն, ըստ տրամաբանության, պետք է երկրորդ պլանում լինի, քաղաքական ուժերից ամեն մեկը փորձում է արենայում մնալ:
«Առավել լարված են Արայիկ Հարությունյանի ու Ռուբեն Վարդանյանի հարաբերությունները: Ռուսաստանից Արցախ մեկնած եւ ընդամենը երեք ամիս պաշտոնավարած Վարդանյանը Հարությունյանին չի ներում «պաշտոն տամ-պաշտոն վերցնեմ» օպերացիայի համար: Բանն այն է, որ Վարդանյանը Հարությունյանի հրավերով է Արցախ գնացել ու անցավ գլուխը ցավի տակ դրել: Բայց ի՞նչ ստացվեց, նրան պաշտոն տալուց երեք ամիս անց ցտեսություն ասացին, ինչն էլ հենց հարաբերությունների սրման պատճառ դարձավ: Այժմ, կարելի է ասել, չեն շփվում: Հարությունյանը վերջերս փորձել է կարգավորել հարաբերությունները, մի սեղանի շուրջը նստել, բայց Վարդանյանը կտրուկ մերժել է հրավերը»,- ասաց մեր աղբյուրը:
ՍԵՎԱԿ ՎԱՐԴՈՒՄՅԱՆ
