«Watertown News» պարբերականում Չարլի Բրեյտրոուզը (Charlie Breitrose) գրում է, որ փետրվարի 11-ին Ուոթերթաունի քաղաքային խորհուրդը միաձայն որոշում է ընդունել արեւելյան Ուոթերթաունի «Dexter Avenue» եւ «Hazel Street»-ի հատման վայրը այսուհետ կոչել Արշիլ Գորկու անունով, ի նշանավորումն հանճարեղ նկարչի հարյուրամյակի: Քաղաքային խորհուրդն իր կայքում գրառել է հետեւյալը. «1915-ի Հայոց ցեղասպանությունից եւ դրա հետեւանքներից փրկվելով՝ Գորկին Ուոթերթաուն ժամանեց 1920-ի փետրվարին` որպես հետապնդումներից փախուստ տվող հայ ներգաղթյալների երրորդ հոսքի ներկայացուցիչ: Իր քույրերի հետ նա Ուոթերթաունում ապրեց մինչեւ 1925-ի սկիզբները, որից հետո տեղափոխվեց Նյու Յորք: Արվեստի պատմության եւ ժամանակակից արվեստի վրա թողած շարունակական ազդեցությունը անգնահատելի է: Ուոթերթաունը երկար ժամանակ ապաստարան է եղել հայ գաղթականների համար եւ Ոուոթերթաունի արեւելյան մասը, որտեղ Գորկին ապրել է, հպարտ է, որ դարձել է հայ արվեստի գործիչների եւ մշակութային կազմակերպությունների օրրանը»:
Անվանակոչության առաջարկը խորհրդին ներկայացրել է Գորկու ծննդյան 100-ամյակի տոնակատարության աշխատանքային հանձնախումբը, որի անդամներն են Ուոթերթաունի հանրային արվեստի եւ մշակույթի համակարգող Լիզ Հելֆերը, շրջանի մշտական բնակիչներից` Ջեկ Դարգոնը: Ամերիկայի հայկական թանգարանի ներկայացուցիչները եւ Ուոթերթաունի պատմության ընկերությունը:
Որոշման համաձայն, խաչմերուկում կանգնեցվելու է մի սյուն եւ տեղադրվելու է մի հուշատախտակ: Երկու հավելյալ հուշատախտակներ էլ տեղադրվելու են Գորկու եւ իր ընտանիքի «86 Dexter Avenue»ի եւ «14 Coolidge Hill Road»ի վրա գտնվող շենքերի պատին:
Հարյուրամյակի շրջանակներում նախատեսվում է «Watertown-Cambridge Greenway»ում տեղադրել Գորկու որմնանկարներից մեկը, ցուցահանդես եւ կինոդիտում Արվեստների Մոսեսյան կենտրոնում, կուրատորական հավաքածու Ուոթերթաունի գրադարանում եւ այլ միջոցառումներ:
«The Armenian Mirror-Spectator»ից նյութը պատրաստեց`
ՀԱԿՈԲ ԾՈՒԼԻԿՅԱՆԸ
